Քաջորդիներից ովքե՞ր և ի՞նչ պարգևների են արժանացել
Ուշադրության կենտրոնում
Սեպտեմբերի 27-ից ՀՀ-ում և Արցախում ռազմական դրություն է, հենց նույն օրը` վաղ առավոտյան, ադրբեջանական ահաբեկչական բանակը հարձակում է սկսել հայկական բանակի և խաղաղ բնակչության դեմ: Ինչպես պատմության հերոսական բոլոր էջերում՝ թշնամին կրկին ետ է շպրտվել: Մարտերը շարունակվում են արդեն 13-րդ օրը:
Թշնամուն ետ մղելու ճանապարհին հայկական բանակը և հողը պաշտպանող հայորդիներից շատերն առանձնացան իրենց սխրագործություններով: Արցախի նախագահի հրամանագրով ստացան Արցախի հերոսի կոչում և ռազմական մի շարք պարգևներ, ցավոք, որոշներն էլ՝ հետմահու: Առաջինը «Արցախի հերոս»ի կոչում ստացավ լեգենդար հրամանատար Կարեն Աղասի Ջալավյանը, ով նաև պարգևատրվեց «Ոսկե արծիվ» շքանշանով: Անպարտ Արցախի անպարտ հերոսի կոչումն են կրում նաև Դավիթ Լյովայի Գրիգորյանը, ով Ֆիզուլիի ուղղությամբ խոցել է հակառակորդի 15 տանկ և 1 ՀՄՄ: Էդգար Էդուրադի Մարկոսյանը, ով Թալիշի ուղղությամբ խոցել է թշնամու 10 տանկ: Յուրա Հայկարամի Ալավերդյանը, ով Ֆիզուլիի ուղղությամբ խոցել է 9 տանկ և 1 ավտոտեխնիկա: Դավիթ Վանիկի Ղազարյանը, ով վարել է մարտը ոչ մի քայլ ետ սկզբունքով: Ցավոք, պարգևատրվել է հետմահու: Գնդապետ Սերգեյ Շաքարյանն, ով կազմակերպել է բազմաթիվ տանկային և հետևակային գրոհներ՝ պատճառելով հակառակորդին զգալի կորուստներ: «Արիության համար» մեդալով պարգևատրվել են՝ լեյտենանտներ Սասուն Սամվելի Հակոբյանը, Միքայել Յուրիկի Հակոբյանը: «Արիության համար» մեդալի են ներկայացվել նաև մայոր Նորայր Բաղդասարյանը՝ թշնամական հրետանային մարտկոց ու կայանքներ ոչնչացնելու համար: Ավագ լեյտենանտ Նվեր Անանյանը «Արիության համար» մեդալի է ներկայացվել հակառակորդի դիրք մտնելու և հատուկ գործողության ընթացքում քարտեզներ, զենքեր և ռազմական գաղտնիք պարունակող այլ փաստաթղթեր բերելու համար:
Ինժեներասակրավորային բարդագույն խնդիրներ կատարելու և դրանով իսկ հակառակորդի առաջխաղացումը կասեցնելու համար կապիտան Գարեգին Սարգսյանը կպարգևատրվի «Արիության համար» մեդալով: Նույն կարգի մեդալներով կպարգևատրվեն նաև սերժանտ-պայմանագրային` Հունան Գասպարյանը, շարքային-պայմանագրային` Նարեկ Աբրահամյանն ու շարքային- պայմանագրային` Նարեկ Գևորգյանը` ավելի քան 2900 մետր հեռավորության վրա թշնամական տանկ ոչնչացնելու և այլ արդյունավետ գործողությունների համար…:
Շարքային Նարեկ Հովհաննիսյանը, կրտսեր սերժանտ Գառնիկ Բաղդասարյանն ու շարքային Դավիթ Դավթյանը տանկային հաշվարկի կազմով ոչնչացրել են թշնամական 3 ՀՄՄ ու երեքն էլ ներկայացվել «Արիության համար» մեդալի: Շարքային Կարեն Ալեքսանյանը` դրսևորելով մարտական բարձր վարպետություն ու սառնասրտություն, կարողացել է դյուրակիր զենիթահրթիռային համալիրով ոչնչացնել թշնամական 4 ԱԹՍ, ինչի համար ներկայացվել է «Արիության համար» մեդալի: Մայոր Միքայել Մովսիսյանն էլ «Արիության համար» մեդալի է արժանացել թշնամական զինուժին պատկանող 1 տանկ խոցելու համար:
«Մարտական խաչ» 1-ին աստիճանի շքանշանի արժանիները դեռևս 5-ն են: Փոխգնդապետ Արման Կոստանյանը, չնայած ծանր մարտական իրադրությանը, չի նահանջել, կազմակերպել է ստորաբաժանման գրագետ պաշտպանությունը, ետ մղել հակառակորդի բազմաթիվ գրոհներն ու, պատճառելով վերջինիս մեծաթիվ կորուստներ, ապահովել գումարտակի պաշտպանության կայունությունը, ինչի համար էլ ներկայացվել է «Մարտական խաչ»-ի ասպետության 1-ին աստիճանի: Նույն կարգի շքանշանի է ներկայացվել նաև փոխգնդապետ Արսեն Խաչատրյանը՝ նույն կերպ ապահովելով պաշտպանության կայունությունն ու հսկայական կորուստներ պատճառելով թշնամական զորքերին: Հերթական մեր հերոսներից մեկը «Մարտական խաչ» 1-ին աստիճանի շքանշանի ներկայացված կապիտան Հրանտ Գալստյանն է: Բարձր պետական պարգևը ստանալու է թշնամական 5 տանկ ու 3 ՀՄՄ ոչնչացնելու համար: Կրտսեր սերժանտ Ռոբերտ Մաթևոսյանը «Մարտական խաչ» 1-ին աստիճանի շքանշանի է ներկայացվել հակառակորդի 6 տանկ ու 1 ՀՄՄ ոչնչացնելու համար: «Մարտական խաչ» 1-ին աստիճանի շքանշանի ներկայացված կապիտան Ալեքսան Սահակյանի վաշտը հայտնվել էր հակառակորդի ծուղակի մեջ: Չի նահանջել, չի հանձնվել, մարտը վարել է մինչև վերջ և, հակառակորդին պատճառելով մեծաթիվ կորուստներ, կազմակերպել է անձնակազմի անվտանգ դուրս բերումը ծուղակից և զբաղեցրել նոր բնագիծ:
«Մարտական խաչ» 2-րդ աստիճանի շքանշանի է ներկայացվել ավագ լեյտենանտ Միհրան Ավդալյանը, ով մասնակցել է մարտական դիրքերից մեկը ետ վերցնելու գործողությանն ու, հայտնաբերելով շրջափակման մեջ ընկած 7 զինծառայողներին, միջոցներ է ձեռնարկել նրանց շրջափակումից հանելու համար: Մայոր Հովհաննես Այվազյանը «Մարտական խաչ» 2-րդ աստիճանի շքանշանի է ներկայացվել թշնամական 3 տանկ խոցելու համար: Մայոր Կարեն Առաքելյանը ներկայացվել է «Մարտական խաչ» 2-րդ աստիճանի շքանշանի՝ հակառակորդի 1 տանկ ու 2 ՀՄՄ խոցելու համար: Թշնամական 2 տանկ խոցելու համար մայոր Հայասեր Դալլաքյանը ներկայացվել է «Մարտական խաչ» 2-րդ աստիճանի շքանշանի: Նույն կարգի շքանշանների են ներկայացվել նաև կրտսեր սերժանտ Աշոտ Եսայանը` 2 տանկ ու 2 ավտոտեխնիկա, և կրտսեր սերժանտ Հրաչ Հայրապետյանը՝ հակառակորդի 2 տանկ խոցելու համար:
Շարքային Մարտին Բաղդասարյանն ու Մակիչ Աղաջանյանը «Մարտական ծառայություն» մեդալների են ներկայացվել` յուրաքանչյուրը երկուական ԱԹՍ խոցելու համար: Հակաօդայինների սխրանքները շարունակվում են:
Նշված բոլոր զինծառայողները շարքում են և, թերևս մինչև պարգևների ստանալը, կներկայացվեն ավելի բարձր պետական գնահատանքի: Այս մասին նշել է Պաշտպանության բանակը: Հայի տեսակին հատուկ սխրագործությունները կրկին վերահաստատվում են:
Աննա Ավետիսյան
1
2
3
4
5
1
2
3
4
5
3
