Կադիրովը հայտարարել է Չեչնիայում սահմանափակումները չեղարկելու երրորդ փուլի մասին
ՄիջազգայինՉեչնիայի ղեկավար Ռամզան Կադիրովը հայտարարել է, որ երկուշաբթի մեկնարկում է հանրապետությունում կորոնավիրուսի պատճառով ընդունված սահմանափակումները հանելու երրորդ փուլը. չեղարկվում են անցագրային ռեժիմը եւ շրջանի ներսում տեղաշարժման սահմանափակումները, հաղորդում է ՌԻԱ Նովոստի-ն:
Ավելի վաղ՝ հունիսի 16-ին, Կադիրովը հայտարարել էր, որ հունիսի 20-ից հետո Չեչնիայում կչեղարկվի կորոնավիրուսի պատճառով ընդունված սահմանափակումների շուրջ 90 տոկոսը, կբացվեն սրճարանները, ռեստորանները փողոցում եւ խաղահրապարակները:
«Սահմանափակումները չեղարկելու երրորդ փուլի մասին Ռամզան Կադիրովը հայտարարել է կորոնավիրուսի կանխարգելման օպերատիվ շտաբի նիստին: Անցագրային ռեժիմը չեղարկվում է, կարելի է ազատ տեղաշարժվել հանրապետությունում, թույլատրվում է բացել առեւտրային կետերը եւ հանրային վայրերը, պետական ծառայողները կսկսեն աշխատել սովորական ռեժիմով»,-նշված է հայտարարության մեջ:
Ապրիլի 5-ին Չեչնիայի իշխանությունները փակել էին շրջանի սահմանները բոլորի համար, բացառությամբ տրանզիտային տրանսպորտի եւ պարենային մատակարարումների: Բացի այդ, մտցվել էր սահմանափակում հանրապետության տեղաշարժի համար 20.00-ից մինչեւ 8.00-ն, ինչպես նաեւ գործում էին միայն 2-ժամանոց թույլտվություններ խանութ եւ դեղատուն այցելելու համար: