«Ապրիլյան պատերազմը հերոսամարտ էր, մահացած տղաներն էլ հերոսներ». Ապրիլյանից անցել է 4 տարի
Հասարակություն«Դիրքապահ» Քառօրյա պատերազմի մասնակիցների միավորումն ապրիլի 4-ին, Եռաբլուրում կհարգի պատերազմում մահացածների հիշատակը: Միավորման նախագահ Մանուել Մանուկյանը NEWS.am-ի հետ զրույցում ասաց, որ թեկուզ եւ փոքր խմբով, սակայն այնուամենայնիվ կայցելեն «Եռաբլուր» զինվորական պանթեոն:
«Մենք այնպես պետք է անենք, որ մեր երկիրը հաջողության հասնի, որովհետեւ եթե մենք գնում ենք այնտեղ ծաղիկ ենք դնում, բայց մեր երկրի համար ոչ մի բան չենք անում, ես իմաստ չեմ տեսնում: Բացի ծաղիկ դնելուց պետք է գործ անենք էլի, եթե ես լինեի այդ տղերքից մեկի տեղում, ինձ համար կարեւոր կլիներ ոչ թե ծաղիկ դնելը այլ ամեն մեկս մեր տեղում մի օգտակար գործ անելը հայրենիքի համար:Ու մենք հիմա պետք է թիկունքը ամրացնենք, այդպես հատուցենք այն տղաների համար, ովքեր հիմա Եռաբլուրում են»,-ասաց նա:
Պատերազմից 4 տարի անց Քառօրյա պատերազմի մասնակիցները այսօր եւս բազմաթիվ խնդիրներ ունեն:
«Շատերը աշխատանք են գտել, աշխատում են, մի մասը սովորում է, մի մասն էլ աշխատանք է փնտրում: Տղաների խնդիրները բազմաթիվ են` կապված ուսման վարձերի, զինգրքույկներում գրառումների եւ նրանց նկատմամբ կիրառվող այլ արտոնությունների հետ կապված: Այս խնդիրները մեր կողմից բարձրաձայնվել ու ներկայացվել է, բայց կոնկրետ արմատական լուծումներ չեն տրվել: Դա ոչ թե անհատի ու անձի հարց է, այլ պատմություն է, որը պետք է գրվի ու անընդունելի է, որ եթե զինծառայողի գրքույկում այդ գրառումը չի արվում»,- ասաց նա:
Մանուել Մանուկյանը հավելեց, որ Քառօրյա պատերազմը պետք է մեզ համար համընդհանուր դաս լինի, որ պետք է ազգը միասնական լինի ցանկացած պարագայում:
«Ինչպես պատերազմի օրերին համախմբվեցինք, այնպես էլ հիմա ու միշտ պետք է միասնական լինենք ու թեկուզ այս օրերին, որ միասնական լինենք մենք վիրուսին կհաղթենք: Ապրիլյան պատերազմը հերոսամարտ է եղել ու մահացած տղերքն էլ ինձ համար հերոսներ են եղել, ովքեր իրենց երիտասարդ կյանքը դրեցին մեր սուրբ հողի ու բոլորիս համար: Մենք բոլորս պետք է գիտակցենք, որ նրանց շնորհիվ ենք մենք հիմա ապրում, շնչում ու մեր խոնարհումը մեր հերոսների ծնողներին, եղբայրներին ու քույրերին: Մենք էլ գործով պետք է ապացուցենք, որ այդ տղաների արյան գինը չի մոռացվում»,-ասաց նա:
Հիշեցնենք, որ 2016 թվականի ապրիլի 1-ի լույս 2-ի գիշերը ադրբեջանական կողմը Արցախի Հանրապետության նկատմամբ սկսեց լայնածավալ հարձակողական գործողություններ, կիրառելով իր զինանոցում եղած ռազմական տեխնիկայի գրեթե բոլոր հնարավոր տեսակները:
Ապրիլի լույս 5-ի գիշերը առաջնային գծի հարավային ուղղությամբ Ադրբեջանի զինված ուժերը կիրառել են «Սմերչ» համազարկային կրակի ռեակտիվ համակարգ:
Ժամը 12․00-ի դրությամբ հաստատվել է հրադադար, դադարեցվել են ռազմական գործողությունները:
Վերջնական տվյալներով` հայկական կողմից ռազմական գործողությունների հետեւանքով զոհվել է 110 եւ վիրավորվել 121 զինծառայող եւ կամավորական:
1
2
3
4
5
1
2
4
5
3
5
