Վանեցյանի քայլը կկասեցնի անկանոն շրջապտույտը
ՎերլուծությունԱյն, որ իշխանությունների հզոր այլընտրանք չունենալու պատճառով երկիրը հայտնվել է անորոշության մեջ և սկսել է իր շուրջն անկանոն պտույտներ անել, անզեն աչքով է երևում: Դա ավելի տեսանելի դարձավ, երբ աշխարհն ապականած վիրուսը մտավ Հայաստան այն պահին, երբ մեզ մոտ «այո» - «ոչ»-ի ակտիվ քարոզարշավ էր ընթանում, երբ հարևան Իրանում արդեն սկսել էր բազմապատկվել վիրուսակիրների թիվը, բայց մեր իշխանությունները առանձնապես չէին շտապում երկրի սահմանները փակել: Մոտավորապես նույն վիճակն է նաև քաղաքական դաշտում: Իշխանություններն ինչ երգ ուզում երգում են և ամեն ջանք գործադրում, որ չեզոքացնեն խորհրդարանական ընդդիմության կողմից հնչեցվող սթափության կոչերը: Ինչ վերաբերում է արտախորհրդարանական քաղաքական ուժերին, այս ամենի հետևանքով նրանք ևս հայտնվել են անորոշության թմբիրի մեջ և իրենք իրենց մատնել դեպրեսիվ անգործության:
Այս անորոշությունից դուրս գալու, երկիրը տեսանելի ու անտեսանելի վիրուսներից մաքրելու և քաղաքական դաշտն առողջացնելու համար անզեն աչքով էլ տեսանելի է, որ երկրին օդ ու ջրի նման հզոր ըննդիմություն է պետք: Ընդդիմություն, որը կհամախմբի արտախորհրդարանական քաղաքական ուժերին, կօգնի, նրանց անորոշության թմբիրից դուրս գալ ու պայքարել հանուն երկրի քաղաքական կյանքի առողջացման: Նման առաջարկ արդեն հնչել է ԱԱԾ նախկին տնօրեն Արթուր Վանեցյանի կողմից, ով ակտիվ քաղաքականությամբ զբաղվելու հայտ է ներկայացնել և պատրաստվում է իր շուրջ համախմբել երկրի ապագայով մտահոգ քաղհասարակության բոլոր ուժերին ու ներկայացուցիչներին: Ասել է, թե այսօր արդեն բոլոր նախապայմանները կան հզոր ընդդիմադիր քաղաքական ուժ ձևավորելու և իշխանություններին հակակշռող ծանրակշիռ այլընտարնք ձևավորելու համար:
Եվ այդ առիթը խորհրդարանից դուրս մնացած ուժերը չեն կարող բաց թողնել, եթե, իհարկե, մի քանի քայլ հեռուն տեսնելու կարողությունը չեն կորցրել: Այլապես երկիրը կշարունակի անկանոն պտտվել իշխանությունների կողմից ղեկավարվող անորոշության թմբիրի շուրջ և դեռ երկար ժամանակ հնարավոր չի լինի սթափ քայլեր իրականացնել ու գնալ առաջ: Կարճ ասած՝ այսօր երկրին օդ ու ջրի նման առողջ ու հզոր ըննդիմություն է պետք, առանց որի հնարավոր չի լինի սթափեցնել իշխանություններին, զսպել նրանց անկանոն վարքագիծն ու երկիրը տանել զարգացման ճանապարհով: Մնում է հուսալ, որ Վանեցյանի՝ քաղաքականություն մուտք գործելու արդեն իսկ ներկայացված հայտը շուտով իր պտուղները կտա և ականատես կլինենք արտաքաղաքական ուժերի համախմբման ու ողջ քաղաքական դաշտի առողջացման: