Ամեն օրվա ձգձգումը ավելի վատ պայմաններ է ստեղծում ներդրողների համար
Հասարակություն«Նաիրիտ» քիմիական գործարանի վերագործարկումը շարունակում է մնալ հանրության, գործարանի նախկին աշխատակիցների, ներդրողների, լրատվամիջոցների ուշադրության կենտրոնում։ «Փաստը» բազմիցս անդրադարձել է հարցին՝ պարբերաբար ընթերցողներին տեղեկացնելով գործարանի սնանկության գործընթացի, աշխատակիցների բարձրացրած խնդիրների, գործարանի վերագործարկման հարցում պետության գործադրած ջանքերի մասին։
Դեռ անցած տարեվերջին պարզ դարձավ, որ գործարանի վերագործարկման նպատակով ներդրողներին ներկայացվելիք առաջարկների նախագիծը պատրաստ է և ներկայացվել է գերատեսչություններին կարծիքներ ստանալու նպատակով:
Այդ մասին հայտարարել էր ՀՀ փոխվարչապետ Տիգրան Ավինյանի գրասենյակի ղեկավար Վարագ Սիսեռյանը:
Նա նաև ասել էր, որ 2020 թվականի հունվարին նախ տեղի կունենա ներքին քննարկում, այնուհետև հանդիպման կհրավիրվի գործարանի աշխատակիցների համակարգող խումբը։ Գործարանի նախկին տնօրեն Կարեն Իսրայելյանը «Փաստի» հետ զրույցում ներկայացնում է գործարանի շուրջ ստեղծված ներկայիս վիճակը։
«Կառավարությունն արդեն ստացել է բոլոր գերատեսչությունների կարծիքները, իրենց մոտ քննարկումները ևս ավարտվել են։ Անցած տարի մենք ևս մասնակցել ենք նախագծի կազմման աշխատանքներին։ Հույս ունենք, որ արդեն մյուս շաբաթ հանդիպում կկազմակերպվի «Նաիրիտի» համակարգող խմբի հետ, որպեսզի արդեն պարզ լինի, թե ինչ պայմաններ են առաջարկվելու ներդրողներին»,-ասում է Իսրայելյանը։
Ավելի վաղ կարծիք էր հնչել, թե, որպես «Նաիրիտը» վերագործարկելու լավագույն տարբերակ, հնարավոր է դիտարկվի գործարանը փուլ առ փուլ աշխատեցնելը։ Իսրայել յանը, սակայն, նշում է՝ առաջին հերթին ներդրողը պետք է որոշի, թե ինչ ձևով կաշխատի գործարանը։
«Բայց գործարանը փուլ առ փուլ, ոչ ամբողջական աշխատեցնելը, կարծում եմ, սխալ կլինի։ Դա գործարանի մասնագետների կարծիքն է։ Գործարանը պետք է աշխատի ամբողջական մեկ միավորով։
Տեխնիկական շատ խնդիրներ կան, որոնք ևս պետք է հաշվի առնել»,-նշում է մեր զրուցակիցը՝ ընդգծելով, որ գործարանի լիարժեք աշխատանքի դեպքում աշխատանք կունենա 1300-ից 1500 մարդ։
Գործարանի նախկին տնօրենն ընդգծում է՝ գործարանով հետաքրքրվողները շատ են։ «Բայց թե նրանցից որ մեկն ինչ որոշում կկայացնի, դեռ պարզ չէ։
Դա կախված է նրանից, թե ինչ պայմաններ է կառավարությունն առաջադրելու ներդրողներին։ Մեզ հասած տեղեկություններով՝ «Նաիրիտով» հետաքրքրված է երկու խոշոր ընկերություն, որոնց հետ կառավարությունը բանակցում է։
Բացի դա, կան ուրիշ ընկերություններ, որոնք ներդրում կատարելու ցանկություն ունեն, սակայն սպասում են կառավարության կողմից ներկայացվելիք փաստաթղթի վերջնական տարբերակի հրապարակմանը»,-շեշտում է Իսրայել յանը։
Նա ասում է՝ կառավարության քայլերը պետք է մի փոքր արագանան։ ««Նաիրիտը» սնանկության գործընթացում է։ Որպեսզի սնանկության գործընթացն առաջ գնա, կառավարության քայլերը ևս պետք է արագացված լինեն։
Մեկ տարի առաջ կատարել ենք գործարանի տեխնիկական աուդիտ, այդ տվյալները հաշվի առնելով ենք ասում, որ պետք է գործարանում 110-120 մլն դոլարի ներդրում կատարել, որպեսզի գործարանը վերականգնվի։
Թե մեկ տարվա ընթացքում գործարանում ինչ է կատարվել, տեղեկություն չունենք, հնարավոր է՝ գործարանում արդեն իսկ փոփոխություններ են կատարվել։
Կառավարությանը տեղեկացրել ենք գործարանի վերագործարկումն ուշացնելու վտանգների մասին, ամեն օրվա ձգձգումն ավելի վատ պայմաններ է ստեղծում ներդրողների համար»,-եզրափակում է գործարանի նախկին տնօրենը։
ԼՈՒՍԻՆԵ ԱՌԱՔԵԼՅԱՆ