Նորագավիթի բնակիչները կոյուղի չունեն. պատկան մարմինները խնդրին տեղյակ են, բայց «սայլը տեղից չի շարժվում»
ՀասարակությունԱնցած տարի էր, երբ վարչապետ Նիկոլ Փաշինյանը շրջայց էր կատարում Վայոց ձորի մարզում՝ տեսնելու, թե ինչպես են օգտագործվել սուբվենցիոն ծրագրերով տրամադրված գումարները։ Եղեգնաձորում նրան մոտեցած քաղաքի բնակիչներն ահազանգեցին՝ 26 տարի է, ինչ իրենց թաղամասը հանձնվել է շահագործման, բայց իրենք մինչև հիմա կոյուղի չունեն։
Փաշինյանի և զրույցին ներկա անձանց դեմքին հայտնված անկեղծ զարմանքը փոխանցվեց նաև ինձ՝ ոչ որպես լրագրողի, այլ որպես քաղաքացու։
Ինչպե՞ս է հնարավոր բնակելի թաղամաս կառուցել և «մոռանալ» կոյուղի կառուցելու մասին։ Բայց ինչո՞ւ հասնել Վայոց ձոր, երբ նույն վիճակն է նաև Շենգավիթ վարչական շրջանում գտնվող Նորագավիթ թաղամասում։ Թաղամասի 13-րդ և 14-րդ փողոցներում գտնվող սեփական տները կոյուղի չունեն։
Հիմա կհարցնեք՝ իսկ ո՞ւր են գնում կեղտաջրերը. կուտակվում են բնակելի տների տակ։ Ինչի՞ կարող է դա հանգեցնել. մի կողմից՝ հակասանիտարական վիճակի, մյուս կողմից՝ թուլանում են տների հիմքերը։ Թաղամասի բնակիչներից Անուշ Ավագյանն արդեն մի քանի տարի է՝ դիմում է պետական տարբեր գերատեսչությունների խնդրին լուծում տալու նպատակով։ Նրա դիմումներին միացել են այն բնակիչները, որոնց միավորում է նույն՝ 21-րդ դարում կոյուղի չունենալու «ցավը»։
Իսկ ինչպե՞ս են խնդրին արձագանքել Շենգավիթի վարչական շրջանի ղեկավարությունը, Երևանի քաղաքապետարանը, «Վեոլիա ջուր» ընկերությունը։ Բոլորը խնդրին տեղյակ են, պատրաստ են օգնել, բայց արդյունքում սայլը տեղից չի շարժվում։
«Թաղամասում կոյուղի չի եղել։ Ժամանակին մասնավոր կարգով մարդիկ հավաքվել են, իրենց հաշվին կոյուղի անցկացրել։ Մեր թաղամասի մոտով՝ ընդամենը 60 մետր հեռավորության վրա, անցնում է Երևանի գլխավոր պոմպագիծը։ Առաջին դիմումս գրելուց հետո ինձ համար ուզում էին այնտեղից կոյուղի անցկացնել։ Երկու անգամ տվել են հնարավորություն, որ միայնակ կոյուղի անցկացնեմ։ Հաշվարկներից հետո պարզվեց, սակայն, որ կոյուղի ունենալը կարժենա 15 միլիոն դրամ։
Սկզբում ուզում էի միայն իմ կոյուղու հարցը լուծել, բայց հետո տեղեկացրեցի նաև հարևաններիս։ Բոլորը համաձայնեցին միանալ և գումար հավաքել։ Կարծում էի, որ ֆինանսական առումով մեզ կօգնի «Վեոլիա ջուր» ընկերությունը, ասենք, այդ գումարի կեսն ինքը կհոգա, կեսը՝ մենք։ Այդ ժամանակ ինձ միացավ 18 ընտանիք, հետո արդեն նույն խնդիրն ունեցող ևս 40 ընտանիք ցանկություն հայտնեց սեփական միջոցներով այս խնդրին լուծում տալ։
Բնակիչներով հավաքվեցինք և դիմեցինք «Վեոլիա ջուր» ընկերությանը, սակայն այնտեղից տեղեկացրեցին, որ ո՛չ, այդպես հնարավոր չէ։ Հետո էլ որոշեցին կոյուղին այնպիսի մի կետից միացնել, որը ոչ մեկին ձեռնտու չէր։ Արդյունքում այս առաջարկից բնակիչները հրաժարվեցին։ Այնուհետև դիմել ենք Շենգավիթի վարչական շրջանի ղեկավար Ռազմիկ Մկրտչյանին։ Նա ասաց՝ իմ հնարավորությունների սահմաններում ամեն կերպ ձեզ աջակցելու եմ»,-«Փաստի» հետ զրույցում ասում է Անուշ Ավագյանը։
Նրա խոսքերով՝ բնակիչներից մի քանիսի հետ հանդիպման ժամանակ վարչական շրջանի ղեկավարն իր մոտ է հրավիրել կոմունալ բաժնի ղեկավարին, ում հանդեպ, սակայն, բնակիչների վստահությունն այնքան էլ մեծ չէ, քանի որ նրանք ծանոթ են նրա աշխատելաոճին, վստահ, որ նա իրենց չի աջակցելու խնդրի լուծման հարցում։ «Վարչական շրջանում հանձնաժողով էր կազմվել, մարդիկ եկան մեր թաղամաս, նորից ծանոթացան խնդրին։
Նրանցից հետո եկավ «Վեոլիա ջուր» ընկերության ղեկավարությունը, հետո՝ Երևանի քաղաքապետարանից։ Բոլորը գալիս ու գնում են։ Սա շարունակվում է 4-5 տարի, բայց ոչ ոք չի ուզում մեզ աջակցել»,-նշում է մեր զրուցակիցը։ Վերջերս բնակիչները նորից դիմել են Երևանի քաղաքապետարան։ «Մեր նամակին պատասխանել է քաղաքապետարանի կոմունալ տնտեսության վարչությունը։
Նշել են՝ խնդրի լուծումից չենք հրաժարվում, բայց երբ ձեր փողոցում կսկսվեն ասֆալտապատման աշխատանքներ, այն ժամանակ սիրով կաջակցենք ձեզ»,-տեղեկացնում է Նորագավիթ թաղամասի բնակչուհին։ Այս պահի դրությամբ վերջին գերատեսչությունը, որտեղ բնակիչները նամակ են ուղարկել, եղել է ջրային կոմիտեն։ Նամակին նախորդ տարվա մարտին պատասխանել է կոմիտեի նախագահի տեղակալը։
Դրանում նշված է, որ 2016 թ.-ի նոյեմբերի 21-ին ջրային տնտեսության պետական կոմիտեի և «Վեոլիա ջուր» ՓԲԸ-ի միջև կնքվել է վարձակալության պայմանագիր, որի համաձայն, ՀՀ բնակավայրերի մեծ մասի ջրամատակարարման և ջրահեռացման համակարգը վարձակալության հիմունքով փոխանցվել է «Վեոլիա ջուր» ընկերությանը։
Ինչ վերաբերում է Երևանի կոյուղու համակարգ չունեցող փողոցներին, ապա, համաձայն վարձակալության պայմանագրի, «Վեոլիա ջուր» ընկերությունը նոր ջրամատակարարման և ջրահեռացման համակարգի կառուցման պարտավորություններ չունի։
Նոր կոյուղագծի կառուցման համար անհրաժեշտ է սահմանված կարգով դիմել «Վեոլիա ջուր»՝ տեխնիկական պայմանագիր ստանալու համար։ Ջրային կոմիտեն միաժամանակ տեղեկացրել է, որ Երևանի ջրահեռացման համակարգի ընդլայնման աշխատանքների իրականացումը ջրային կոմիտեն պատրաստ է քննարկել հետագա համապատասխան ներդրումային ծրագրերի շրջանակներում։
Սա, իհարկե, պատասխան նամակի ողջ բովանդակությունը չէ, բայց ինչպես տիկին Անուշն է ասում, մեկ տողով այն այսպես կարելի է մեկնաբանել՝ «հինգ տարի տևած շրջապտույտից հետո պարզվում է, որ «Վեոլիա ջուր» ընկերությունն այժմ ներդրումներ կատարելու հնարավորություն չունի»։
«Մենք՝ բնակիչներս, ասում ենք՝ ի վիճակի ենք ներդրում անելու, ուղղակի մեզ պետական որոշակի աջակցություն տվեք։ Նորից դիմել ենք Շենգավիթ վարչական շրջանի կոմունալ բաժին, ասում ենք՝ ձեզանից բան չենք խնդրում, կոյուղու խնդիրը լուծենք, բայց հետո հանկարծ չգաք քանդեք, ասեք՝ անօրինական է կամ էլ տուգանեք մեզ»,-եզրափակում է մեր զրուցակիցը։
Հ. Գ.- «Փաստը» հետամուտ կլինի խնդրին։ Ի դեպ, առաջիկայում կփորձենք ստանալ նաև վերը նշված մարմինների պարզաբանումները և խնդրի լուծման վերաբերյալ նրանց առաջարկները։
ԼՈՒՍԻՆԵ ԱՌԱՔԵԼՅԱՆ