Ամենայն Հայոց Կաթողիկոսն ընդունել է Եգիպտոսի հայոց թեմի առաջնորդին և թեմական ժողովի անդամներին
ՔաղաքականությունՍեպտեմբերի 26-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Եգիպտոսի հայոց թեմի առաջնորդ Գերաշնորհ Տ. Աշոտ եպիսկոպոս Մնացականյանին և Կահիրեի թեմական ժողովի անդամներին:
Աշոտ Սրբազանը, հայցելով Նորին Սրբության օրհնությունը, տեղեկացրել է, որ Կահիրեի թեմական ժողովի անդամները ժամանել են Հայաստան` մասնակցելու Վեհափառ Հայրապետի օրհնությամբ Կահիրեի ազգային առաջնորդարանի ջանքերով ամբողջականորեն վերանորոգված և բուժսարքավորումներով ապահովված Արցախի Հադրութ քաղաքի գլխավոր հիվանդանոցի ծննդաբերական բաժանմունքի բացման արարողությանը: Սրբազանն ուրախությամբ փաստել է, որ սա Կահիրեի ազգային առաջնորդարանի առաջին մեծ նախաձեռնությունն է ի նպաստ հայրենիքի և հայրենաբնակ ժողովրդի, որը շարունակական բնույթ է ունենալու` ընդգրկելով նաև սահմանամերձ բնակավայրերը:
Ողջույնի և շնորհակալության խոսք է ասել նաև թեմական ժողովի անդամ Մարտիրոս Բալայանը:
Այնուհետև Ամենայն Հայոց Կաթողիկոսն իր գնահատանքն է բերել Եգիպտոսի հայոց թեմի առաջնորդին, թեմական ժողովի անդամներին և հայ համայնքին` ազգային կյանքում դրսևորած նախանձախնդրության, հայի ինքնության պահպանմանն ուղղված ծրագրերի, ինչպես նաև նման օգտաշատ նախաձեռնության կազմակերպման համար: Հայոց Հովվապետը նշել է, որ հայոց պատմության ընթացքում Հայ Եկեղեցու թեմերի և նրանց կողքին կանգնած բարերար հայորդիների շնորհիվ է, որ կյանքի են կոչվել բազում նմանօրինակ ծրագրեր՝ ի նպաստ հայ ժողովրդի և ի պայծառություն Ազգային Եկեղեցու: Իր հայրական օրհնությունը փոխանցելով ներկաներին` Վեհափառ Հայրապետը գոհունակությամբ հաստատել է, որ նրանց այս քայլը կարևոր զորակցություն է արցախահայությանը:
Խոսելով Եգիպտոսի հայ համայնքի փառավոր պատմության մասին՝ Նորին Սրբությունն ուրախությամբ արձանագրել է, որ այսօր ևս հայ համայնքը շարունակում է նույն նախանձախնդրությամբ և աշխույժ ազգային-եկեղեցական կյանքով պահպանել այն բոլոր ավանդույթները, որոնք ժամանակի ընթացքում ստեղծվել և փոխանցվել են սերնդեսերունդ:
Հանդիպման ավարտին Գարեգին Երկրորդ Կաթողիկոսը հայցել է Տիրոջ զորակցությունն այս հայանպաստ նախաձեռնության իրականացման համար և հորդորել Կահիրեի թեմական ժողովի անդամներին իրենց ակտիվ ներգրավվածությամբ շարունակել ծաղկեցնել իրենց համայնքն ու տիրախնամ թեմը:
1
2
3
4
5
1
2
4
5
3
5
