Պատրաստ ենք աշխատել ըստ շուկայի պահանջարկի. Սպանդանոցների ներկայացուցիչները՝ ՍԱՏՄ քննարկման ժամանակ

Բոլոր հնարավորություններն ունենք եւ պատրաստ ենք աշխատել ըստ շուկայի պահանջարկի։ Այս մասին ասել են մի շարք սպանդանոցների ներկայացուցիչներ ՀՀ ԿԵ սննդամթերքի անվտանգության տեսչական մարմնի կողմից հրավիրված քննարկման ժամանակ: 

NEWS.am-ին ՍԱՏՄ–ից հայտնում են, որ Տեսչական մարմնի ղեկավարի խորհրդական Արթուր Շատվորյանը հիշեցրել է, որ թարմ մսի սպանդանոցային ծագման պարտադիր պայմանի կիրառումը հասարակական սննդի կետերում սկսվել է օգոստոսի 1-ից եւ կոնկրետ սպանդանոցների պատրաստականության վիճակից է կախված լինելու հանրային սննդի կետերի կողմից նշված պարտադիր պայմանի կատարումը: Նա նաեւ տեղեկացրել է, որ մշակվել է հստակ ճանապարհային քարտեզ, որի համաձայն էլ կիրականացվի վերահսկողությունը հանրապետության հանրային սննդի կետերում: 

«Մենք խստորեն հետեւելու ենք, որ վերահսկողությունը չվերածվի սպանդանոցային մորթն ուղեկցող 5-րդ ձեւի փաստաթղթի շրջանառության: Այս թեման տարբեր հարթակներում քննարկվել է եւ եկել է արդեն գործնական քայլեր անելու ժամանակը: Ակնկալում ենք ձեր գործուն աջակցությամբ գործընթացը կազմակերպել պատշաճ կերպով»,- ասել է Արթուր Շատվորյանը:

Հիշեցնենք, որ 2020 թվականի հունվարի 15-ից սպանդանոցային մորթի պահանջը պարտադիր կլինի սննդի շղթայի բոլոր օպերատորների համար:

Ներքոնշյալ սպանդանոցներն այս պահին էլ պատրաստ են ցանկացած հանրային սննդի կետի, ինչպես նաեւ իրացման ցանցի օբեկտի տրամադրել իրենց պահանջներին հանապատասխան թարմ միս եւ մսեղիք: