«Այլևս չենք կարող գեթ մեկ օր ուշանալ». Էրդողանը հայտարարել է, որ ԱՄՆ կոչերից անկախ՝ թուրքական ԶՈւ-ն կմտնի սիրիական Մանբիջ

Թուրքիայի նախագահ Ռեջեփ Թայիփ Էրդողանը հայտարարել է, որ ի հեճուկս ԱՄՆ-ից հնչած կոչերին՝ թուրքական ԶՈւ-ն կմտնի սիրիական Մանբիջ, գրում է թուրքական «Հյուրրիյեթ» պարբերականը:

Էրդողանը շեշտել է, որ թուրքական ԶՈւ-ն պետք է մտնի Մանբիջ ու դուրս հանի այնտեղից քուրդ զինյալներին, քանի որ ԱՄՆ-ն՝ չնայած իր տված խոստումներին, այդպես էլ չարեց դա:

«Մաքրում, մաքրում էիք, չկարողացաք դուրս հանել, այդ դեպքում մենք պիտի մտնենք Մանբիջ: Ես բացահայտ եմ ասում. Թուրքիան բավական ժամանակ է կորցրել Եփրատի արևելքում ահաբեկչական խմբավորումների գործողություններին միջամտելու հարցում: Այլևս չենք կարող գեթ մեկ օր ուշանալ»,- ասել է Թուրքիայի ղեկավարը:

Նախօրեին Էրդողանը հայտարարել է, որ երկրի ԶՈւ-ն հաշված օրեր անց ռազմական գործողություն կսկսի Սիրիայի տարածքում Եփրատ գետի աջ ափին տեղակայված քրդական ուժերի դեմ:

ԱՄՆ Պենտագոնի մամուլի քարտուղար Շոն Ռոբերտսոնը «անընդունելի» էր որակել Թուրքիայի ռազմական գործողությունների ծրագիրը Մանբիջում՝ հիշեցնելով, որ այնտեղ գտնվում են նաև ամերիկացի զինվորականները: Էրդողանը, սակայն, պնդել էր, որ թուրքական ԶՈւ-ն չի թիրախավորի ամերիկացի զինվորականներին և կպայքարի միայն քուրդ զինյալների դեմ: