Թրամփի վարչակազմը չի աջակցի Խաշոգջիի սպանության բացահայտմանը. The Washington Post
ՄիջազգայինԱմերիկյան հեղինակավոր The Washington Post պարբերականը, որի թղթակից, սաուդցի ընդդիմադիր լրագրող Ջամալ Խաշոգջին սպանվել է Ստամբուլում Սաուդյան Արաբիայի հյուպատոսությունում, հավանական չի համարում ԱՄՆ իշխանությունների կողմից լրագրողի սպանության լիարժեք բացահայտումը:
Պարբերականը ուշագրավ է համարում այն փաստը, որ թեև Սաուդյան Արաբիան նշում է, որ ձերբակալել է Խաշոգջիի սպանության 18 կասկածյալի, սակայն հայտնի չէ, թե նրանց ինչ մեղադրանքներ են առաջադրվել, ինչպես նաև մինչ օրս չեն հրապարակվել նրանց անունները:
Սակայն ըստ The Washington Post-ի՝ Խաշոգջիի սպանության անպատիժ մնալն ԱՄՆ-ի համար ոչ միայն անհաջողություն է բարոյական տեսակետից, այլև բաց թողնված հնարավորություն: Ի վերջո՝ ԱՄՆ-ն կարող էր, օգտվելով ստեղծված իրավիճակից, մի շարք պահանջներ առաջադրել Սաուդյան Արաբիային, այդ թվում՝ այդ երկրում բանտարկված լրագրողներին ու կին ակտիվիստներին ազատ արձակելու վերաբերյալ:
Հիշեցնենք, որ ավելի վաղ հեղինակավոր The New York Times պարբերականը հրապարակել էր Խաշոգջիի սկանդալային սպանության վերաբերյալ արված լրագրողական հետաքննության արդյունքները, համաձայն որոնց սպանությունն իրագործել է թագաժառանգի մերձավորներից մի քանիսի ղեկավարած խումբը:
Հայտնի է, որ լրագրողը հոկտեմբերի 2-ին մտել է Ստամբուլում Սաուդյան Արաբիայի հյուպատոսարան ու այլևս այնտեղից դուրս չի եկել: Ավելի ուշ հայտնաբերված ապացույցների համաձայն՝ Խաշոգջիին սպանել են, հետո մասնատել: Նրա դին առ այսօր չի հայտնաբերվել: