Մանվել Գրիգորյանին պատկանող ավելի քան 40 օբյեկտ սեփականաշնորհվել և օտարվել է կեղծ մրցույթների միջոցով. Փաշինյան
ՔաղաքականությունՀատուկ քննչական ծառայությունը պարզել է, որ ԱԺ պատգամավոր Մանվել Գրիգորյանին պատկանող ավելի քան 40 օբյեկտ՝ Արմավիրի և Տավուշի մարզերում, սեփականաշնորհվել և օտարվել է կեղծ մրցույթների միջոցով: Այդ մասին Քաջարանի ընտրողների հետ հանդիպմանը հայտարարեց վարչապետի պաշտոնակատար Նիկոլ Փաշինյանը:
Նա նշեց, որ Տարածքային և զարգացման նախարարությունն արդեն գրություններ է ուղարկել համայնքներին՝ հորդորելով դիմել դատարաններ և վերադարձնել այդ գույքը:
«Արմավիրում 475 հեկտար տարածք, Դիլիջանում՝ առողջարան կվերադարձվեն համայնքներին: Մենք քայլ առ քայլ ժողովրդից գողացվածը հետ ենք բերելու»,- նշեց Փաշինյանը:
Խոսելով երկրի վիճակի մասին՝ Նիկոլ Փաշինյան ասաց, որ Հայաստանն ամեն օրվա հետ փոխվում է, քանի որ ամեն օր փոխվում է նաև ՀՀ քաղաքացու ինքնազգացողությունը:
«Յոթ ամսվա մեջ ամեն ինչ իդեալական, իհարկե, չի եղել, բայց փոխվել է քաղաքացու կարգավիճակը ՀՀ-ում, փոխվել է իշխանության կարգավիճակը Հայաստանում: Հայաստանի Հանրապետությունում իշխանությունը մենք չենք, իշխանությունը դուք եք, և այս ընտրություններին մեր մեծագույն խնդիրն է՝ հաստատել իշխանափոխությունը ընտրություններով»,- ասաց Նիկոլ Փաշինյանը:
Նրա խոսքով՝ բացառությամբ 1991 և 1999 թթ. ընտրությունների՝ Հայաստանում տեղի չեն ունեցել ընտրություններ, որի ընթացքում ժողովրդի կամքը հստակ արտահայտվի, և շատ կարևոր է, որ դա լինի այս ընտրություններին:
«Մենք իշխանություն ենք, ունենք լծակներ՝ սեփականատերերին, գյուղապետերին, տնօրեններին, ոստիկանապետերին ասելու՝ գնացեք, ասեք ժողովրդին մեզ ընտրեն, բայց մեզ ասովի ոչ մի հատիկ ձայն անհրաժեշտ չէ, նա, ով ուզում է մեր և ժողովրդի միջև առկա կապը, վստահությունը մթագնել, պղծել բերովի, ասովի, ցուցակով ձայներով... մեզ հարկավոր չեն, մեզ հարկավոր է ՀՀ ազատ, ինքիշխան, հպարտ քաղաքացու ձայնը, և վարչապետից սկսած՝ քաղաքացուն ոչ ոք չի կարող ասել՝ ում ընտրի, նա կկատարի իր ընտրությունը»,- հայտարարեց «Իմ քայլը» դաշինքի առաջնորդը:
Անդրադառնալով աշխատատեղերի ստեղծման խնդրին՝ Նիկոլ Փաշինյանն ասաց, որ իր կառավարությունը պաշտպանելու է բոլոր ներդրումները՝ խոշոր թե մանր, մեծ թե փոքր, և այդպիսով խրախուսելու է նոր աշխատատեղերի ստեղծումը:
«Բայց մարդու աշխատանքը նոր Հայաստանում չի կարող օգտագործվել նրա ազատությունները սահմանափակելու համար: Մենք դա թույլ չենք տա, որևէ մեկը իրավունք չունի քաղաքացուն պարտադրել որևէ ընտրության, անցել են այն ժամանակները, երբ գործարանատերերը, գյուղապետերը ՀՀ քաղաքացուն պիտի ասեն՝ ում ընտրի, այս հեղափոխությունը ՀՀ քաղաքացուն դարձրել է ինքնիշխան, ով պարտադրի, նա մեր քաղաքական հակառակորդն է, և մենք գալու ենք նրա ետևից:
Փաշինյանը նշեց, որ Քաջարանը հանքարդյունաբերության խոշոր կենտրոն է, բայց իրենք ուզում են, որ տնտեսության մեջ հանքարդյունաբերության դերը նվազի, ուզում են զարգացնել մշակվող արդյունաբերությունը: «ՀՀ-ում հանքարդյունաբերությունը պետք է քայլ առ քայլ բարձրացնենք և համապատասխանեցնենք եվրոպական չափանիշներին՝ նաև հասարակության սոցիալական պատասխանատվության իմաստով: Մենք պետք է այնպես անենք, որ Հայաստանում ձուլարաններ ստեղծվեն, այդպես աշխատատեղերը կլինեն ավելի շատ, նոր աշխատատեղեր կստեղծվեն: Մեր պրոբլեմները կարող ենք լուծել աշխատանքի միջոցով, մեր հասարակության համար պետք է ստեղծենք աշխատանքի և ձեռներեցության պայմաններ»,- եզրափակեց վարչապետի պաշտոնակատարը: