Հարավային Սուդանում զինված անձինք ավելի քան 100 կանանց են բռնաբարել
ՄիջազգայինՀարավային Սուդանի հյուսիսում գտնվող Բենթիու քաղաքում զինված անձինք վերջին 10 օրվա ընթացքում 125 կնոջ են բռնաբարել, հաղորդում է Reuters-ը: Ըստ գործակալության՝ այդ մասին հայտարարել են «Բժիշկներ առանց սահմանների» միջազգային մարդասիրական կազմակերպության աշխատակիցները:
Չնայած Դինկա և Նուեր ժողովուրդների միջև թշնամանքի փաստացի դադարեցմանը՝ աշխարհի ամենաաղքատ երկրներից մեկում շարունակվում են էթնիկ զտումները, երկրում գործում են ավազակախմբեր:
Այդպիսի ավազակախմբերից մեկը ներխուժել է Բենթիու քաղաք, զինված անձինք կողոպտել են բնակիչներին, դաժան ծեծի ենթարկել շատ տղամարդկանց և բռնաբարել կանանց: Բժիշկների տվյալների համաձայն՝ բռնաբարվածների շարքում կան ինչպես 10-ամյա աղջնակներ, այնպես էլ տարեց կանայք: Բժիշկների օգնությանն է դիմել ընդհանուր 125 կին:
Տեղի իշխանությունները հերքում են, որ քաղաքում այդ մասշտաբի վայրագություններ են տեղի ունեցել: