Հիացմունքով եմ հետևում ներկայիս «Միլանին». Զլատան Իբրահիմովիչ

«Լոս-Անջելես Գելեքսիի» հարձակվող Զլատան Իբրահիմովիչը մեկնաբանել է «Միլան» վերադարձի վերաբերյալ լուրերը:

Մամուլում շրջանառվող լուրերի համաձայն՝ 37-ամյա ֆուտբոլիստն արդեն իսկ համաձայնել է կես տարվա վարձակալությամբ հանդես գալ իտալական ակումբում:

««Միլանի» կողմից հետաքրքրություն կա, սակայն «Լոս-Անջելես Գելեքսիի» հետ իմ պայմանագրի ժամեկտը լրանալու է միայն մեկ տարուց: 

Գաղտնիք չէ, որ «Միլանի» ներկայացուցիչներին դուր է գալիս իմ խաղը: Ես այս թիմում երկու հիանալի տարի եմ անցկացրել և չեմ ցանկացել հեռանալ, սակայն հետո ինձ ստիպեցին տեղափոխվել Փարիզ:

Ես խաղացել եմ Իտալիայի 3 մեծագույն ակումբներում՝ «Յուվենտուսում», «Միլանում» և «Ինտերում»: «Միլանում» ինձ շատ լավ են վերաբերվել: Հավանական տեղափոխությանս վերաբերյալ չեմ ասի «ոչ» կամ «այո»: Տեսնենք՝ ինչ կլինի:

Ջենարո Գատուզոն հիանալի ֆուտբոլիստ էր, իսկ հիմա լավ մարզիչ է դարձել: Հիացմունքով եմ հետևում ներկայիս «Միլանին», թիմի գրանցած հաջողություններին, և ինձ դուր է գալիս այն, ինչ տեսնում եմ», - Իբրահիմովիչի խոսքը մեջբերել է Vanity Fair-ը: