31 մարդու կյանք խլած անտառային հրդեհները Կալիֆոռնիայի պատմության մեջ ամենամահացուն են դարձել (լուսանկարներ)
ՄիջազգայինԱՄՆ Կալիֆոռնիա նահանգի հյուսիսային հատվածում անտառային հրդեհների զոհերի թիվը հասել է 31-ի, հայտնում է Daily Mail-ը՝ նկատելով, որ դրանք Կալիֆոռնիայի պատմության մեջ ամենամահացու անտառային հրդեհներն են:
Նշվում է, որ զոհերից 29-ը հայտնաբերվել են ամբողջովին մոխրացած Փերըդայս քաղաքում, որտեղ կրակը «կուլ է տվել» 6.700-ից ավելի տուն:
Նշվում է, որ եղանակային անբարենպաստ պայմանները, մասնավորապես՝ ուժեղ քամին, նպաստում են կրակի արագ տարածմանը:
Բաթ համայնքի շերիֆ Քորի Հոնեան նշել է, որ զոհերի ինքնությունը պարզելը չափազանց բարդ է, քանի որ հիմնականում հայտնաբերվում են այրված մնացորդներ, ոսկորներ:
Ենթադրվում է, որ զոհերի թիվը կավելանա, քանի որ ներկայում կա 228 անհետ կորած:
Միացյալ Նահանգների նախագահ Դոնալդ Թրամփը սպառնացել է Կալիֆոռնիային զրկել դաշնային ֆինանսավորումից՝ պատճառաբանելով նահանգային իշխանությունների՝ ավերիչ անտառային հրդեհները մարել չկարողանալու փաստը: Նախագահը քննադատել է Կալիֆոռնիայի իշխանություններին հրդեհների մարման հարցում լավ չաշխատելու համար: