Իսրայելն ի վիճակի չէ հարվածել Սիրիա բերված ռուսական С-300-ներին. Իրանի խորհրդարանի ղեկավար
ՄիջազգայինԻսրայելն ի վիճակի չէ հարվածել Սիրիա բերված ռուսական С-300 զենիթահրթիռային համալիրներին: Այդ մասին հայտարարել է Իրանի Իսլամական Հանրապետության խորհրդարանի ղեկավար Ալի Լարիջանին, գրում է «РИА Новости» գործակալությունը:
Ավելի վաղ Իսրայելի տարածաշրջանային համագործակցության նախարար Ցախի Հանեգբին հայտարարել էր, որ С-300-ների մատակարարումը Սիրիային որևէ կերպ չի ազդի Իսրայելի ռազմաօդային ուժերի ենթակայության տակ գտնվող ամերիկյան F-35 կործանիչների արդյունավետության վրա:
«Ես չեմ կարծում, որ իսրայելցիներն ընդունակ են որևէ լուրջ քայլի», - ասել է Լարիջանին՝ ընդգծելով, որ ռուսական С-300-ի ներկայությունը Սիրիայում Ռուսաստանի լիիրավ իրավունքն է, նամանավանդ՝ ռուսական ինքնաթիռի դեմ հարձակումից հետո:
ՌԴ պաշտպանության նախարարության համաձայն՝ սեպտեմբերին Սիրիայում Իլ-20 ռուսական ինքնաթիռը կործանվել է այն պատճառով, որ իսրայելցի օդաչուներն այն դրել են սիրիական հակաօդային պաշտպանության հարվածի տակ:
Ռուսական Իլ-20 ինքնաթիռը կործանվել է սիրիական C-200 հակաօդային պաշտպանության համալիրի արձակած հրթիռից, զոհվել է 15 ռուս զինծառայող: