Reuters․ Դեմոկրատները լայնածավալ հետաքննություններ են պատրաստում Թրամփի և նրա գործարար շրջապատի նկատմամբ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ Ներկայացուցիչների պալատի դեմոկրատները պատրաստում են լայն ռազմավարություն նախագահ Դոնալդ Թրամփի հետ կապված ընկերությունների և ֆինանսական կառույցների նկատմամբ հետաքննություններ անցկացնելու համար՝ նոյեմբերին կայանալիք միջանկյալ ընտրություններից հետո կուսակցության իշխանության վերադառնալու դեպքում նրա իմպիչմենտի ընթացակարգն անմիջապես սկսելու փոխարեն, հաղորդում է Reuters գործակալությունը՝ հղում անելով քննարկումներին ծանոթ չորս աղբյուրների։

Նրանց վկայությամբ, Ներկայացուցիչների պալատում Դեմոկրատական կուսակցության ղեկավարները և հանձնաժողովների աշխատակիցները քննարկում են լսումների, ծանուցագրերի և փաստաթղթերի պահանջների կիրառումը՝ Թրամփի քաղաքական և գործարար շրջապատի հետ կապված ընկերություններից և այլ կազմակերպություններից տեղեկություն ստանալու համար։

Դեմոկրատները ակնկալում են, որ մասնավոր ընկերությունների և արտաքին ֆինանսական կառույցների գործունեության հետաքննությունը ավելի արդյունավետ կլինի, քան Սպիտակ տան հետ ուղիղ առճակատումը, որը, ինչպես սպասվում է, կդիմադրի խորհրդարանական վերահսկողությանը։

«Մենք չենք պատրաստվում սկսել իմպիչմենտ հայտարարելու նպատակով։ Ոչ ոք չի ցանկանում առաջին օրը տապալված քվեարկություն։ Գլխավորը հետաքննությունների ընթացքում ապացուցողական բազա հավաքելն է, որը թույլ կտա Թրամփին պատասխանատվության ենթարկել», — հայտարարել է Դեմոկրատական կուսակցության բարձրաստիճան ներկայացուցիչը։

Հանրապետականներն այժմ Ներկայացուցիչների պալատում պահպանում են միայն փոքր առավելություն, մինչդեռ հարցումները ցույց են տալիս, որ դեմոկրատները լավ շանսեր ունեն նոյեմբերյան ընտրություններում վերականգնելու վերահսկողությունը պալատի նկատմամբ։ Հաղթանակի դեպքում նրանք հնարավորություն կստանան ուղարկել ծանուցագրեր, պահանջել փաստաթղթեր և ցուցմունքներ, անցկացնել հրապարակային լսումներ և հասնել պատասխանատվության ենթարկելու՝ Կոնգրեսի նկատմամբ անհարգալից վերաբերմունքի համար։

Աղբյուրները նշում են, որ դեմոկրատներն ակնկալում են, որ Սպիտակ տունը կվիճարկի կամ կանտեսի անմիջապես գործադիր իշխանությանը հասցեագրված հարցումները։ Այդ պատճառով տեղեկատվության կարևոր աղբյուր կարող են դառնալ վարչակազմի հետ աշխատող ընկերությունները, կապալառուները և ֆինանսական կառույցները։

Հնարավոր հետաքննությունների քննարկումներում հիշատակվում են Apple, Alphabet, Palantir, Blackstone, BlackRock, ինչպես նաև Իլոն Մասկին պատկանող ընկերությունները, ներառյալ Tesla-ն։ Աղբյուրները նշում են, որ թիրախների վերջնական ցանկ դեռ չկա, և պաշտոնական հետաքննությունները դեռ չեն սկսվել։ Reuters-ը տվյալներ չի հայտնաբերել այն մասին, որ թվարկված ընկերությունները մեղադրվում են որևէ իրավախախտման մեջ։

Դեմոկրատները նաև ծրագրում են ուսումնասիրել ԱՄՆ ներքին անվտանգության նախարարության պայմանագրերը, Սպիտակ տանը նոր պարահանդեսային սրահի կառուցման ֆինանսավորումը, կորպորատիվ նվիրատվությունները և վարչակազմի ու նրա աջակիցների միջև հնարավոր «ծառայություն՝ ծառայության դիմաց» սխեմաները։

Առանձին ուշադրություն կարող է դարձվել Թրամփի ընտանիքի հետ կապված ֆինանսական կառույցներին, ներառյալ 1789 Capital վենչուրային ընկերությունը, որի գործընկերներից է նրա որդին՝ Դոնալդ Թրամփ կրտսերը։ Դեմոկրատները նաև մտադիր են ուսումնասիրել օտարերկրյա ինքնիշխան հիմնադրամների ներդրումները նախագահի ընտանիքի հետ կապված կառույցներում, որոնք կարող են հարցեր առաջացնել վարչակազմի վրա ազդեցության վերաբերյալ։

Աղբյուրների տվյալներով, դեմոկրատներն արդեն սկսել են նախապատրաստվել հնարավոր հետաքննություններին։ Կուսակցության ղեկավարները ընկերություններին, կապալառուներին և այլ կազմակերպություններին ուղարկում են փաստաթղթեր պահանջող նամակներ։ Այս դիմումները կարող են հիմք դառնալ հետագա ծանուցագրերի համար, եթե կուսակցությունը մեծամասնություն ստանա Ներկայացուցիչների պալատում։

Ներկայացուցիչների պալատի հանձնաժողովներում առաջատար դեմոկրատների՝ Ռոբերտ Գարսիայի և Ջեյմի Ռասկինի ներկայացուցիչները հայտարարել են, որ գործող հետաքննությունները կընդլայնվեն կուսակցության հաղթանակի դեպքում։

Հնարավոր ուղղությունների թվում Գարսիան նշել է Պենտագոնի պայմանագրերը, որոնք, նրա պնդմամբ, կարող են օգուտ բերել նախագահի որդիներին, Թրամփի կրիպտոարժութային եկամուտները և նրա քաղաքական արշավի դոնորների հետ գործարքները։

Միաժամանակ դեմոկրատները չեն բացառում Թրամփի իմպիչմենտը։ Աղբյուրների կարծիքով, ընթացակարգը կարող է նախաձեռնվել, եթե հետաքննությունները բացահայտեն իրավախախտման ապացույցներ, որոնք հիմք են իմպիչմենտի համար, սակայն այն չի դիտարկվում որպես առաջին քայլ։

Այս մոտեցումը կապված է նաև Թրամփի առաջին նախագահական ժամկետի փորձի հետ։ Այն ժամանակ Ներկայացուցիչների պալատը երկու անգամ նրան իմպիչմենտ էր հայտարարել, սակայն Սենատը ամեն անգամ արդարացնում էր նախագահին։

«Եթե հետաքննությունները բացահայտեն ապացույցներ, որոնք, մեր կարծիքով, համապատասխանում են անհրաժեշտ շեմին, մենք առանց երկմտելու կսկսենք գործել», — հայտարարել է դեմոկրատների բարձրաստիճան ներկայացուցիչը։

Հետևեք մեզ՝ այստեղ