Անիրատեսական է խոսել Մեսսիի վերադարձի մասին որպես խաղացող. «Բարսելոնայի» նախագահ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Բարսելոնայի նախագահ Ժոան Լապորտան ընդունել է, որ «չգիտեր» Լեո Մեսսիի անակնկալ այցի մասին, սակայն այն համարում է «սպոնտան և բարսելոնական քայլ»։ Այս մասին գրում է Sport.es-ը։

«Բարսելոնայի» նախագահ Ժոան Լապորտան ելույթ է ունեցել Catalunya Ràdio-ի «El Matí» հաղորդման եթերում՝ Ռիկարդ Ուստրելի հետ հարցազրույցում անդրադառնալով ակումբի ներկա իրավիճակին։

Բնականաբար, ուշադրության կենտրոնում էր Լեո Մեսսիի անակնկալ այցը Spotify Camp Nou՝ առանց ակումբի նախազգուշացման։ Այն համընկավ SPORT-ում տպագրված հարցազրույցի հետ, որտեղ Մեսսին խոսել էր իր ցավի մասին՝ կապված «Բարսայից» հեռանալու ձևի հետ, ինչպես նաև իր ցանկության՝ ապագայում վերադառնալու Բարսելոնա և ակումբ։

«Լավ, գիտեմ՝ ինչպես եղավ դա»,— հիշեց Լապորտան՝ նշելով, որ Մեսսիի այցը «սպոնտան, բարսելոնական քայլ էր։ Ես դրա մասին չգիտեի»,— խոստովանեց նա՝ հավելելով, որ Լեոն կարող է ցանկացած պահի վերադառնալ Կամպ Նոու, քանի որ «դա իր տունն է»։

«Երբ ինձ ասացին, թե ինչպես էր եղել, դա ինձ թվաց հաճելի, անմիջական և բարսելոնական դրսևորում»,— հավելեց Լապորտան։

«Մեր հարաբերությունները նորմալ են, ես նրան որևէ հաղորդագրություն չեմ ուղարկել։ Այստեղ մենք նրան սիրում ենք, սա նրա տունն է, և նա դա գիտի։ Միշտ ասել ենք՝ արդար է, որ նա ստանա աշխարհի ամենագեղեցիկ հարգանքի արարողությունը։ Կարծում եմ՝ դա հիասքանչ կլինի։

Աշխատում ենք, որպեսզի այստեղ հնարավոր լինի հանդիպումներ անցկացնել, և այդ շրջանակում կցանկանայի, որ տեղի ունենար հարգանքի արարողություն աշխարհի լավագույն ֆուտբոլիստի համար։ Գիտեմ, որ նրան նույնպես դա կուրախացնի։ Ոչնչի համար չեմ զղջում․ «Բարսան» բոլորից վեր է։ Չեղավ այնպես, ինչպես բոլորս կուզեինք, բայց այդ պահին հնարավոր չէր։ Եթե հարգանքի արարողությունը կարող է փոխհատուցել դա, մենք ուրախ կլինենք»։

Այնուամենայնիվ, Լապորտան ընդգծեց. «Անիրատեսական է խոսել Լեո Մեսսիի վերադարձի մասին որպես խաղացող»։

Հետևեք մեզ՝ այստեղ