Ձերբակալված փոխնախարարը նպատակ է ունեցել լքել երկիրը
ՔաղաքականությունՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Ընդամենը մի քանի ժամ առաջ վարչապետի հրամանագրով էկոնոմիկայի նախարարի տեղակալ Անի Իսպիրյանն ազատվեց աշխատանքից։ Մինչ մենք փորձում էինք պարզել, թե որն է ազատման պատճառը, լուր ստացանք, որ էկոնոմիկայի նախարարությունում իրավապահները գործողություն են անում։ Նախարարության նորանշանակ խոսնակ Աստղիկ Սարգսյանը 168․am-ի հետ զրույցում հասատատել էր փաստը, սակայն հրաժարվել էր պաշտոնյայի անունը նշել։ Թեեւ րոպեներ անց արդեն հայտնի դարձավ, որ խուզարկում են առավոտյան աշխատանքից ազատված փոխնախարարի կաբինետը, որին բերման են ենթարկել։ Տարել են նաեւ նրա առանձնասենյակից ինչ որ փաստաթղթեր։ Բերման են ենթարկվել նախարարության այլ աշխատակիցներ եւս։
Բայց ուշագրավն այն է, որ այն պահին, երբ նախարարությունում խուզարկություն էր իրականացվում, նախարար Վահան Քերոբյանը գտնվում էր Ազգային ժողովում՝ մասնակցում էր տնտեսական հարցերի հանձնաժողովի նիստին։ Եւ նիստից հետո մեր լրագրողի հարցին ի պատասխան (դեռ հայտնի չէր խուզարկության մասին), թե ինչու է աշխատանքից ազատվել Անի Իսպիրյանն ասել էր, որ նա պատրաստվում է մեկնել երկրից, Հոլանդիա է գնում՝ ամուսնու մոտ, դա էր ազատման պատճառը։ Այսինքն, նախարարին անգամ չեն տեղեկացրել, որ իր տեղակալը կասկածվում է ինչ որ հանցանքի մեջ։ Իրավապահներն ուղիղ վարչապետի հետ են աշխատել եւ նա էլ՝ գործողությունն իրականացնելուց առաջ, շտապել է ազատել փոխնախարարին՝ իրենից հեռացնելով կոռուպցիայի եւ չարաշահումների մեղադրանքը։
Մենք փորձեցինք ծանոթանալ Անի Իսպիրյանի կենսագրությանը, պարզվեց՝ նա 32 տարեկան է, Լոմոնոսովի պետական համալսարանն է ավարտել, փոխնախարարի է նշանակվել 2021 թվականի սեպտեմբերի 14-ին։ Ապրել է Ռուսաստանում, եղել է «Մոդուլ» ՍՊԸ շինարարական ընկերությունում գործադիր տնօրեն, Հայաստան է եկել Ի գործ ծրագրի շրջանակներում, իսկ 20 օր առաջ՝ հունվարի 7ժին նշանակվել է ԱՆԻՖ հիմնադրամի տնօրենների խորհրդի նախագահ։ Այսինքն, գոնե 2 ամիս առաջ նրա հետ կապված վարույթ չի եղել՝ հակառակ դեպքում ահռելի ֆինանսներ տնօրինող հիմնադրամի նախագահ չէր նշանակվի։
Իսկ առավել ուշագրավ է, որ էկոնոմիկայի նախարարության կայքից իսպառ ջնջվել է փոխնախարարին վերաբերող ողջ տեղեկատվությունը։ Նրա անունը փնտրելիս նկարում պատկերված տեսարանին ես հանդիպում։
Արեգ Մարգարյան