Ուկրաինայի դեմ ՌԴ գործողությունների մեկնարկի ժամկետ է նշվում
ՄիջազգայինԱրեւմտյան երկրների հետախուզություններն ու ԶԼՄ-ները վերջին օրերին շարունակում են մանրամասներ ներկայացնել Ուկրաինայի դեմ ՌԴ գործողությունների հնարավոր սցենարների վերաբերյալ։ Տարածված տեղեկությունների համաձայն, Ուկրաինայում կազուս բեյլի՝ պատերազմի առիթ ստեղծելու համար կատարվելու են սադրանքներ, որից հետո Մոսկվան անընդունելի կետերով վերջնագիր է ներկայացնելու, որը չի ընդունվելու, այնուհետեւ ՌԴ-ն հրթիռային հարվածներ է հասցնելու Ուկրաինայի տարածքում տեղակայված ռազմական օբյեկտներին։
Ցամաքային գործողության կամ ներխուժման հնարավորության վերաբերյալ նշվում է, թե Մոսկվան դժվար թե գնա դրան մի շարք պատճառներով։ Նախեւառաջ՝ հնարավոր մեծ կորուստների եւ պատժամիջոցների պատճառով, որոնք կարող են խարխլել ՌԴ սոցիալ-տնտեսական վիճակը եւ սրել ներիշխանական խմբերի բախումները, ինչը սպառնալիք է Պուտինին եւ նրա վարչակարգին։
Բացի այդ, նշվում է, որ ԱՄՆ-ին ու ՆԱՏՕ-ին ներկայացված վերջնագրերի մերժումից հետո անելանելի վիճակի մեջ հայտնված Պուտինի համար այս տարբերակը «դեմքի փրկություն» կլինի։ Որպես դեմքը փրկելու միջոց՝ նշվում է նաեւ Դոնբասի անկախությունը Մոսկվայի կողմից ճանաչելու եւ հակամարտությունը սառեցնելու տարբերակը։
Ուշագրավ է, որ ռուսական համացանցում նշվում է նաեւ գործողությունների ժամկետը․ սադրանքները պլանավորված են փետրվարի 18-ին, բուն գործողությունները՝ հրթիռային հարվածները՝ փետրվարի 21-ին։ Սադրանքների տակ նկատի են առնվում ընդհուպ մահափորձերը պրոկրեմլյան գործիչների, Ղրիմի ղեկավարների հանդեպ։
Զուգահեռներ են տարվում Վրաստանի դեմ 2008-ին Ռուսաստանի ռազմական գործողությունների հետ։ Պեկինի ամառային օլիմպիադայի օրերին ՌԴ զորքը ներխուժեց Վրաստան, ՌԴ-ն ճանաչեց Աբխազիան եւ Օսիան։ Ուկրաինայի դեմ հնարավոր գործողությունները նույնպես «համընկնում են» Պեկինի ձմեռային օլիմպիադային, մի տարբերությամբ, որ ըստ ԶԼՄ-ների հրապարակումների՝ Պեկինը Մոսկվային խնդրել է գործողություններ չիրականացնել մինչեւ խաղերի ավարտը։ Պեկինի ձմեռային օլիմպիական խաղերն ավարտվում են փետրվարի 20-ին։
1
2
3
4
5
1
2
4
5
3
5
