Լավրովը բացահայտում է․ հայկական կողմը առաջարկներ է արել Ադրբեջանին

Հայաստանյան մեդիադաշտը երեկ անուշադրության մատնեց կարևորագույն մի իրադարձություն՝ ՌԴ ԱԳ նախարար Սերգեյ Լավրովի հայտարարությունը սահմանազատման հանձնաժողովի մասին։ ՌԴ ԱԳ նախարարը նշել է, թե քարտեզների և սահմանագծման հարցերով շփվել է իր հայ գործընկերոջ հետ։

«Կողմերից կան համապատասխան առաջարկներ, քանի որ հանձնաժողով ստեղծելու համար առաջին հերթին պետք է պայմանավորվել, թե ինչ պայմաններով։ Այդ պայմանները այժմ քննարկվում են։ Այնտեղ տարաձայնություններ կան: Մեր դիրքորոշումը պարզ է. պետք է նստել և պաշտոնապես ստեղծված հանձնաժողովի շրջանակներում լուծել բոլոր այն հարցերը, որոնք դեռ համաձայնեցված չեն»,- ասել է Լավրովը։

Ռուս պաշտոնյան նշում է, թե հայկական կողմը տակավին վերջերս նոր առաջարկներ է ներկայացրել, սակայն չի մանրամասնում այդ առաջարկների էությունը։ Նրա խոսքով՝ Սոչիում Ռուսաստանի, Հայաստանի և Ադրբեջանի ղեկավարների հանդիպման ժամանակ (2021 թվականի դեկտեմբերին) սկզբունքային համաձայնություն է ձեռք բերվել։

«Եվ նույնիսկ մամուլի հետ շփվելու ժամանակ հույս է հայտնվել, որ հանձնաժողովը կստեղծվի մինչև 2021 թվականի վերջ, բայց կրկին կյանքն ավելի բարդ է, հայկական կողմը նոր առաջարկներ ունի, մենք դրանք փոխանցում ենք Բաքվին։ Տեսնենք, թե ինչպես անել, որպեսզի հանձնաժողովը որքան հնարավոր է շուտ գործարկվի»,- ասել է ՌԴ ԱԳ նախարարը։

Որևէ առաջարկի մասին չի հայտնել նաև Հայաստանի գործող վարչախումբը։ Ինչը, թերևս, արդեն ձևավորված արատավոր պրակտիկա է, Նիկոլ Փաշինյանը միայն պոստֆակտում է պատմում կատարված իրողությունների, Հայաստանի դեմ կատարած իր հերթական դավադրության մասին։ Իսկ այդպիսի դեպքերի համար կան Փաշինյանի կատաղի կողմնակիցները և ֆեյքերի բանակը, որոնք միահամուռ թեզերով փորձում են սվաղել վտանգներն ու ռիսկերը, իսկ գործող իշխանությունների յուրաքանչյուր դավաճանություն ներկայացնել որպես գործողություն «ի փառս Հայաստանի Հանրապետության»։

Միքայել Պետրոսյան