Ինչո՞ւ է Փաշինյանը պարտվել պատերազմում, բայց հաղթել ընտրություններում
ՎերլուծությունRiafan.ru-ն գրում է, որ «Պատրիոտ մեդիա գրուպ»-ի մամուլի կենտրոնում տեղի է ունեցել մամուլի ասուլիս Հայաստանում արտահերթ խորհրդարանական ընտրությունների վերաբերյալ, որում հաղթել է Նիկոլ Փաշինյանը:
Մասնակցել են քաղաքագետ Հրանտ Միքայելյանը, աշխարհաքաղաքական փորձաքննության կենտրոնի տնօրեն Վալերի Կորովինը, «Հայաստան» դաշինքի պատգամավորի թեկնածու Հայկ Խալաթյանը և «Քաղաքացիական պայմանագիր» կուսակցության պատգամավորի թեկնածու, Միացյալ աշխատավորական կուսակցության (ՄԱԿ) նախագահ Գուրգեն Արսենյանը: Վալերի Կորովինը կարծիք է հայտնել, որ Փաշինյանը շրջանցել է իր մրցակիցներին միայն այն պատճառով, որ հայ ժողովուրդը այլ ելք չի ունեցել, քանի որ ամբողջ քաղաքական դաշտը «ստեղծվել է արևմուտքի և ամերիկացի քաղաքական ստրատեգների կողմից»:
«Հայաստանում Սորոսի ստեղծած քաղաքական ուժերին այլընտրանք չկա: Ամբողջ քաղաքական պլատֆորմը, բոլոր քաղաքական ուժերը ստեղծվել են արևմտյան քաղաքական ստրատեգների մասնակցությամբ: Նրանց մեծ մասը բացի լոգոտիպից և մի քանի կոչերից բացի այլ բան չունեն: Այդ կառույցների ամբողջ բազմազանությունից մարդիկ ընտրել են մեկին, որն արդեն իսկ իշխանության մեջ է և ինչ որ քաղաքական փորձ ունի», - ասել է նա:
Ինչո՞ւ է Փաշինյանը պարտվել պատերազմում, բայց հաղթել ընտրություններում։ Ըստ Հրանտ Միքայելյանի, Փաշինյանը գրագետ աշխատանք է կատարել լրատվական տարածքում, ինչը նրան օգնել է հաղթել ընտրություններում: «Նա կենտրոնացել է ոչ այնքան իր կառավարման արդյունքների և հաջողությունների, որքան մեդիայի ոլորտում գրանցված հաջողությունների վրա: Նա դա արել է ինտենսիվորեն և հաջողված: Արդյունքը ստացվել է։ Ասացվածք կա ՝ «լինել, ոչ թե թվալ», Փաշինյանի մոտ հակառակն է՝ «թվալ, այլ ոչ թե լինել»:
Ուստի նա կարողացել է կտրուկ առաջ գնալ ներկայացնելով առկա իրավիճակը որպես իր տեսակետից առավել բարենպաստ, հատկապես նախընտրական քարոզչության վերջին օրերին: Բացի այդ, քարոզչությունը շարունակվել է երեք տարվա ընթացքում առանց դադարելու: Արդյունքում, Փաշինյանը կարողացել է իր տեսլականն առաջարկել ընտրողներին այնպես, որ շատերն այն ընդունել են, հատկապես գյուղերում: Հայաստանում շատ աղքատներ կան: Փաշինյանը նրանց ասել է. «Դուք մեղավոր չեք, այլ մեղավոր են մյուսները՝ վերնախավը և նրանք, ովքեր լավ են ապրում, և մենք բոլորին կպատժենք»:
Ըստ փորձագետի նա այդ մասին խոսել է իր ողջ նախընտրական արշավի ժամանակ, և դա դեր է խաղացել։ Հայկ Խալաթյանը զարմանալի է համարել Փաշինյանի հաղթանակը: Չնայած ընտրություններում առկա մեծ թվով անօրինականություններին, Հայաստանի վարչապետի պաշտոնակատարը շահել է, դա անսպասելի է, ասել է նա: «Փաշինյանին տրված այսքան զգալի թվով ձայները հնարավոր չէ բացատրել միայն խախտումներով: Այդ արդյունքները վկայում են բուն հայ հասարակության բարդ խնդիրների մասին, որը դեռ ցնցման մեջ են: Փաստորեն, մարդիկ որոշել են, որ ներկայիս կառավարությունն ավելի լավն է, քան այլընտրանքային ուղի առաջարկող ուժերը, որոնք առաջարկում են տանջվել և որոշակի ջանքեր գործադրել ճգնաժամից դուրս գալու համար», - բացատրել է փորձագետը:
ՄԱԿ նախագահ Գուրգեն Արսենյանը կարծում է, որ հալածանքներ, բախումներ չեն եղել, պայքարն արդար է եղել: Պատգամավորի թեկնածուն շեշտել է, որ ժողովուրդը հույսը դրել է իր առաջնորդի Նիկոլ Փաշինյանի վրա: «Պարտված պատերազմը պարզապես պարտված պատերազմ է: Տհաճ պահեր են պատահում տարբեր երկրների պատմության մեջ և կյանքում: Պատերազմի փաստը ճակատագրական չէ: Ժողովուրդը հավատում է իր առաջնորդին, ժողովուրդը հավատում է, որ այդ անձը Նիկոլ Փաշինյանն է: Ոմանք ասում են, որ Ռուսաստանի հետ հարաբերությունները կարող են վատթարանալ, բայց կարծում եմ, որ համագործակցությունը կշարունակվի ամենաբարձր մակարդակով: Սա հայ ժողովրդի ցանկությունն է, որը իշխանություններն աջակցում են իրենց ժողովրդին: Եվրոպական երկրների հետ հարաբերությունները չպետք է ազդեցություն ունենան Ռուսաստանի հետ հարաբերությունների վրա», - եզրափակել է նա:
Անի Սայադյան
Pressmedia.am