Առաջնորդի ուսանելի օրինակը
ՔաղաքականությունՍտեղծված ծանր իրավիճակում՝ Արցախյան պատերազմում պարտությունից հետո յուրաքանչյուրը պետք է մի կողմ դնի իր անձնական ամբիցիաները և ջանքերը համադրի կարող ուժերի հետ՝ պետությունն անդունդից դուրս բերելու համար։ Ազգային անվտանգության ծառայության ղեկավար, «Հայրենիք» դաշինքը գլխավորող Արթուր Վանեցյանը հրաշալի օրինակ է, թե ինչպես կարելի է մի կողմ դնել տարակարծությունները, միավորվել նախկին քաղաքական հակառակորդների հետ, գործուն քայլեր ձեռնարկել ի շահ Հայաստանի Հանրապետության։
Մեծ համարձակություն է պահանջվում՝ հանրությանը ցույց տալու, որ պետության առաջ ծառացած սպառնալիքների դեպքում պետք է բացառել քաղաքական տարաձայնությունները, հների և նորերի բաժանումը։ Այլևս բոլորի, թե՛ հների, և թե՛ նորերի խնդիրը մեկն է, եթե սիրում են իրենց հայրենիքը, ձգտում վերականգնել Հայաստանի նախկին փառքը, վերականգնվել ցավալի պարտության հասցրած տնտեսական, քաղաքական եւ բարոյահոգեբանական վնասներից, պետք է մեկտեղեն ուժերը ընդդեմ ապիկար իշխանությունների։
2018թ․ իշխանափոխությունից հետո ԱԱԾ պետի պաշտոնը ստանձնած Վանեցյանը պատերազմից դեռ շատ առաջ լքեց իշխանության շարքերը, հեռացավ Փաշինյանի կառավարությունից, և երկիրը անդունդ գլորողներին կոչ արեց կանգ առնել։ Նա իր համախոհների հետ ստեղծեց «Հայրենիք» կուսակցությունը, ակտիվորեն մասնակցեց քաղաքական գործընթացներին, պատերազմի ժամանակ էլ գլխավորեց ջոկատը և մեկնեց առաջնագիծ։ Այժմ էլ Արթուր Վանեցյանը միավորվել է Հայաստանի նորագույն պատմության ամենաամուր կուսակցություններից մեկի՝ Հանրապետականի հետ, և մասնակցելու է արտահերթ ընտրություններին։ Պատճառը մեկն է՝ Փաշինյանի իշխանության յուրաքանչյուր օրը վնաս է հասցնում Հայաստանին։ Տարբեր տարիների Հայաստանի անվտանգության պատասխանատու անձինք իրավունք չունեն մի կողմ քաշվել, երբ թշնամին սպառնում է երկրի գոյությանը, իսկ իշխանությունը իր ապիկարության պատճառով վտանգում ինքնիշխանությունը։
Կարեն Առաքելյան