Պարտության մեղավորը իշխանությունն է, այլ մեղավորներ թող չփնտրեն

Պատերազմի մեղավորությունը  այլ մարդկանց վրա բարդելու` Նիկոլ Փաշինյանի գործելաոճը շարունակվում է ամեն ժամ և րոպե. բոլորը մեղավոր են, բացի իրենից ու իր թիմից: Ապօրինաբար քրեական գործեր պատվիրելուց հետո, կարծես թե, իշխանությունը թայմ աութ է վերցրել, քանի որ նախընտրական շրջան է, զբաղված են սեփական վերարտադրությամբ և նման մանր հարցերով զբաղվելու ժամանակ չունեն: Ըստ էության, միակ  մարդը, որին փորձեցին հռչակել պատերազմում պարտության մեղավոր և շարունակում է մնալ կալանքի տակ, Հայաստան զենք ներկրողն է: Չնայած տեղեկություններ կան, որ  Գալստյանին մեղսագրվող բոլոր հանցանքները գերատեսչություններում և փորձագիտական շրջանակներում հերքվել են, նա, կարծես թե, պատանդ է պահվում՝ անհրաժեշտության դեպքում որպես պատերազմում պարտության մեղավոր կրկին շոուի մաս դառնալու համար:

Այս թեմայով Pressmedia.am -ը զրուցել է «Վան» օպերացիայի ղեկավար, ԱՍԱԼԱ-ի մարտիկ Վազգեն Սիսլյանի հետ։

—Պարոն Սիսլյան, արդյոք  Դավիթ Գալստյանն է  միակ  մեղավորը  այս պարտության և ինչու են այս  իշխանությունները մնան  ցաքուցրիվ քաղաքականությամբ, փորձեց մեղքը մի հոգու վրա բարդել, իսկ հիմա էլ նախընտրական քաղաքական շրջան մտանք և  այդ  գործն էլ են քնացրել։ 

— Նախ առաջինը  մեղքը ուրիշի վրա բարդելու քաղաքականությունը ակնհայտ է, որ կա։ Ինձ համար այս պարտության առաջին մեղավորը գերագույն գլխավոր հրամանատարն է,  միանշանակ այդպես է և ոչ այդ անունը  թող շահարկել ,ոչ  էլ հեքիաթներ պատմեն։ Մեր  դիրքերից  վերադարձած  տղերքը,  բոլորը միանշանակ խոսում էին, որ  իրենց ուղարկել են դիրքեր, իսկ իրենց հրամանատարները իրենց կողքին չեն եղել։ Դուք  էլ կարող եք հետաքրքրվել և տեսնել, թե բարձրագույն հրամանատարներից քանի հոգի  ռումբի տակ մնաց և զոհվեց։ Այսօր պարզ է, որ պարտություն է և դրա համար մեղավոր են փնտրում   առանց հասկանալու, որ իրենք ողջ ժողովրդին են  հարվածում և  հենց առաջին մեղավորը նա է, ով  որ այդ մեղավորին է փնտրում։ Ու այդ նախընտրական խաղերը  կարծում եմ, որ իրենք հերթական անգամ շատ վատ բան են անում, որ այս պատերազմի վրա, այսքան տղերքի  արյան վրա քաղաքական խաղեր են խաղում։  Դա ինձ համար անընդունելի է։ 

—Իսկ ճիշտ եք համարում, որ այս պարտության համար մինչ օրս  իշխանությունները ոչ քաղաքական և ոչ էլ իրավական պատասխանատվություն չեն կրել։

— Ինչպես արդեն  նշեցի այս պարտության համար առաջին մեղավորը հենց իշխանությունն է  և ցանկացած նորմալ պետության մեջ  նման պարտության համար  այդ երկրի իշխանությունը հրաժարական է տալիս։ Դա բնական երևույթ է, բայց մեր մոտ աթոռին կպնելու  հիվանդություն է և քիչ է կառչել են աթոռին,  դեռ  դրանից հետո էլ արդարանում են, դա ինձ համար անընդունելի է։ Ես ուզում եմ հասկանամ, այս 44 օրյա պատերազմում մենք ընդհանրապես բանակ ունեցել ենք, թե ոչ,  մենք միայն զոհեր ենք տվել և ոչ մի դիրքում, ոչ մի տեղ բացարձակ  դիմադրություն և պատերազմական գործողություն  չենք լսել, միայն լսում ենք, որ դռոնները գալիս մեր երեխեքին խփում ու գնում էին։ Ինձ համար  առաջին մեղավորը իշխանություններն են  և դա  կասեի նախկիններին էլ նրանց նախկիններին էլ, եթե  այդ պատերազմում էլ այսպես լիներ։ Այսօր  ռեալ դաշտի վրա խնդիր կա`   պատերազմ ենք պարտվել, տարածքներ ենք կորցրել  և գոյություն ունեցող իշխանություններն են մեղավոր  և պետք չի ուրիշ մեղավորներ փնտրել։

Սոնա Գիշյան

Pressmedia.am