Հանդիպումից մեծ ակնկալիքներ պետք չի սպասել
ՎերլուծությունԻրանի հետ երկկողմ առևտրատնտեսական համագործակցության զարգացման հեռանկարները քննարկելու նպատակով Հայաստանի էկոնոմիկայի նախարար Վահան Քերոբյանը Իրանում է։ Այս թեմայով pressmedia.am կայքը զրուցել է նախկին էկոնոմիկայի նախարար, տնտեսագետ Արմեն Եղիազարյանի հետ։
— «Աուդիտորների պալատի» նախագահ Նաիրի Սարգսյանը` վերլուծելով Հայաստանի 2020 թվականի տնտեսությունը, ներկայացրել, թե ինչպիսի զարգացում կարող է ունենալ տնտեսությունը 2021 թ-ին։ Ըստ Նաիրի Սարգսյանի, պետական բյուջեի մուտքերն ապահովող կարևորագույն խողովակների հոսքի կրճատման հետևանքով արդեն ապրիլից կունենանք թոշակների, աշխատավարձերի, նպաստների ուշացումներ՝ դրանից բխող բացասական հետևանքներով: Դուք ինչ կարծիք ունեք այս մասին։
— Մարդիկ պետք է հրապարակեն իրենց ծախսերը, հաշվեն եկամուտները և հայտարարեն, թե ինչքան պարտք են պատրաստվում վերցնել ու ինչ է լինելու տնտեսության մեջ։ Դա ոչ Նաիրի Սարգսյանի, և ոչ էլ իմ որոշելու հարցն է։ Մարդիկ տեսնում են իրենց ծախսերը, տեսնում են իրենց մոտավոր եկամուտները, տեսնում են, թե ինչքան պարտք պետք է լինի, և ըստ դրա որոշում են գերակայությունները։
— Իրանի հետ երկկողմ առևտրատնտեսական համագործակցության զարգացման հեռանկարները քննարկելու նպատակով Հայաստանի էկոնոմիկայի նախարար Վահան Քերոբյանը Իրանում է։ Ի՞նչ եք կարծում, այդ քննարկումները ինչպես կարող են նպաստել Հայաստանի տնտեսական ոլորտի զարգացմանը։
— Մինչ այսօր քանի՞ նման այց է եղել տարբեր նախարարների և այլ պետական անձանց կողմից, ի՞նչ արդյունքներ են գրանցել․․․ Ուրեմն այդ հանդիպումից մեծ ակնկալիքներ պետք չի սպասել, սա ոչ առաջին, և ոչ էլ վերջին այցն է։ Եվ պետք չի կարևորություն տալ այն ամենին, որոնք սովորական իրադարձություններ են։ Բնական է, որ մարդիկ պետք է գնան հարևան երկրներ և այլ պետություններ ինչ-որ պայմանավորվածություններ ձեռք բերելու համար, բայց դրանից առանձնապես ոչինչ չի բխում։ Պետք չի ավելորդ հույսեր և ոգևորություններ, որովհետև մարդիկ պետք է աշխատեն և կարող է ստացվել կամ չստացվել այդ աշխատանքը։ Նախարարը չի որոշելու, թե ինվեստիցիա կգա կամ չի գա և հետո ճգնաժամի ժամանակ ի՞նչ ինվեստիցիա պետք է լինի, որ գոնե կարողանան փրկեն եղած տնտեսությունը։ Պահանջարկը որ կրճատվում է՝ որևէ շահույթ չի լինում։
Աննա Սիմոնյան