Համայնքներին կոչ ենք անում ակտիվ ներգրավվել աշխատանքներում. ԿԳՄՍ փոխնախարար
Ուշադրության կենտրոնումԱրցախից ժամանած մեր հայրենակիցների կրթությունը պատշաճ կազմակերպելու համար ԿԳՄՍ նախարարությունը առցանց քննարկում էր կազմակերպել հասարակական կազմակերպությունների, զարգացման կենտրոնների, գրադարանների և այլ կառույցների ներկայացուցիչների հետ։ Նախարարի տեղակալ Ժաննա Անդրեասյանը տեղեկացրել է, որ այս ընթացքում իրականացվել է իրենց բնակավայրից ժամանակավորապես հեռու գտնվող դպրոցականների կրթության շարունակականությունը ապահովելու բոլոր քայլերը: Երեխաները կարող են հաճախել իրենց այս պահի փաստացի բնակության վայրին մոտ գտնվող դպրոց։ Բոլոր դպրոցականներն ապահովվել են նաև անհրաժեշտ դասագրքերով։ Ուսումնարանների, քոլեջների և բուհերի արցախցի ուսանողները ևս, ըստ իրենց մասնագիտության, ուսումը կշարունակեն ՀՀ ուսումնական հաստատություններում։ «Պարբերաբար կապի մեջ ենք մարզերի պատասխանատուների հետ: Ինքս եմ անընդհատ այցելում երեխաների ժամանակավոր կեցավայրեր, որպեսզի տեղում ծանոթանամ՝ ինչ խնդիրների են նրանք բախվում։ Մենք խրախուսում ենք բոլոր երեխաներին և նրանց ծնողներին, որոնք ունեն կրթության շարունակականության խնդիր, իսկ համայնքներին կոչ ենք անում ակտիվ ներգրավվել այս աշխատանքներում»,- նշեց Ժաննա Անդրեասյանը։
Սերինե Բադալյան