Արդյո՞ք Ադրբեջանը և Թուրքիան ամերիկյան ռազմական օգնությունն օգտագործում են մարդու իրավունքների խախտման համար. ԱՄՆ Սենատ
Ուշադրության կենտրոնումԱՄՆ Դեմոկրատական կուսակցության ամերիկացի սենատորների խումբը ԱՄՆ պետքարտուղար Մայք Պոմպեոյին ուղղված հարցում է պատրաստել՝ Լեռնային Ղարաբաղի շուրջ հակամարտության սրացումից ի վեր՝ Հարավային Կովկասում Թուրքիայի կողմից ամերիկյան արտադրության F-16 կործանիչ-ռմբակոծիչների կիրառման վերաբերյալ: Անտոն Նիկիտինի հոդվածը վերցրել ենք «Взгляд»-ից:
Սենատորներն ամերիկյան դիվանագիտության ղեկավարին առաջարկել են պարզաբանել՝ արդյոք Ադրբեջանը և Թուրքիան ամերիկյան ռազմական օգնությունն օգտագործում են մարդու իրավունքների խախտման համար: Մասնավորապես, Պոմպեոյից պահանջել են պարզել՝ 2020 թվականի սեպտեմբերի 27-ի հակամարտության սրացումից ի վեր՝արդյոք Անկարան Հարավային Կովկասում ամերիկյան արտադրության F-16 կործանիչ-ռմբակոծիչներ է կիրառել:
Ենթադրվում է, որ ԱՄՆ պետքարտուղարը,բանաձևի ընդունումից ոչ ուշ, քան 30 օր հետո, Սենատի արտաքին գործերի և ԱՄՆ Կոնգրեսի Ներկայացուցիչների պալատի կոմիտեներին կծանոթացնի Ադրբեջանի և Թուրքիայի կառավարությունների կողմից մարդու իրավունքների ենթադրյալ խախտումների վերաբերյալ իր եզրակացություններին:
Նախաձեռնության հեղինակներն ԱՄՆ Դեմոկրատական կուսակցության սենատորներն են՝ Բոբ Մենենդեսը, Քրիս Վան Հոլենը, Բոբ Քեյսին, Էդուարդ Մարկին, Ռիչարդ Դուրբինը, Կորի Բուկերը և Ջեք Ռիդը:
Բացի այդ, ԱՄՆ արտաքին քաղաքականության վարչության ղեկավարին կարգադրվել է իշխանության օրենսդիր մարմնին տեղեկացնել՝ արդյոք ներկայումս «արտակարգ իրավիճակներ կան, որոնք անհրաժեշտ են դարձնում շարունակել անվտանգության ոլորտում աջակցություն ցուցաբերել» Անկարային և Բաքվին:
Հոդվածի հեղինակը հիշեցնում է, որ երկուշաբթի օրը, Լեռնային Ղարաբաղի ռազմական գործողություններում Ադրբեջանին բաց աջակցություն ցուցաբերելու հետ կապված՝ Թուրքիային ՆԱՏՕ-ից հանելու վերաբերյալ բանաձև են մտցրել ԱՄՆ Կոնգրեսի Ներկայացուցիչների պալատ:
Ռուզան Հովհաննիսյան