Ալիևի ռևերանսները
ՎերլուծությունԻնչպես հայտնի է՝ օրերս Իլհամ Ալիևը հայտարարել է, թե պատրաստ են քննարկել խաղաղապահների հարցը, բայց այդ դեպքում կառաջարկեն իրենց պայմանները: Միաժամանակ, նա խոսել է նաև Վլադիմիր Պուտինի միջնորդությամբ Մոսկվայում հանդիպելու պատրաստակամության մասին, իհարկե ասելով, որ ամեն ինչ կախված է օրակարգից:
Այսօր Վաշինգտոնում սպասվում է Հայաստանի և Ադրբեջանի արտաքին գործերի նախարարների հետ ԱՄՆ պետքարտուղար Մայք Պոմպեոյի առանձին հանդիպումները: Պոմպեոն հայտարարել է, որ նպատակ ունեն հասնել հրադադարի՝ նշելով, որ նախկին երկու փորձերը, որոնք, հիշեցնենք՝ արել էին Ռուսաստանն ու Ֆրանսիան, ձախողվել են: Հարց է առաջանում՝ ինչո՞ւ է երրորդ փորձն անում ԱՄՆ-ն, և իրականում արդյո՞ք դա կարող է լինել հերթապահ ինչ-որ փորձ, և մի՞թե Վաշինգտոնն ունի դրա անհրաժեշտությունը: Առավել ևս այն դեպքում, երբ այդ փորձը հաջողության չհասնելու պարագայում դա կարող է իր ազդեցությունը թողնել մինչև անգամ Թրամփի նախագահական ընտրության արդյունքի վրա: Հետևաբար, եթե Վաշինգտոնը պատերազմի սկզբից մոտ չորս շաբաթ անց, տևական դադարից հետո ցուցաբերում է որոշակի աշխուժացում և նախաձեռնում արտգործնախարարների հանդիպում, պետք է ենթադրել, որ կան որոշակի լուրջ նպատակներ: Կիրագործվեն դրանք, թե ոչ, այլ հարց է, անշուշտ, և պայմանավորված է մի շարք գործոններով, որ ընկած են թե՛ ԱՄՆ նախագահական ներքին գործընթացում, թե՛ ամերիկա-թուրքական, թե՛ ամերիկա-ռուսական և անգամ, թերևս, ամերիկա-իսրայելական հարաբերություններում: Բայց եթե Վաշինգտոնը պետքարտուղարի մակարդակով ձեռնամուխ է եղել ուղիղ միջնորդության և փաստորեն ստանձնել դրա համար պատասխանատվություն, կնշանակի, որ կան լուրջ նպատակներ:
Ըստ էության այդ համատեքստում էլ դիտարժան է դառնում, որ հրադադարի խախտման և պատերազմի գործիք դարձած Ալիևը փորձում է Վաշինգտոնում արտգործնախարարական հանդիպումից առաջ որոշակի ռևերանս անել Ռուսաստանի կողմը, հավանության արժանացնելով մոսկովյան գաղափարները:
Արդյո՞ք Ալիևը որոշակի անհանգստություն ունի Վաշինգտոնի աշխուժությունից և միջնորդությունից և փորձում է ստանալ Ռուսաստանի բարյացակամությունը և, հնարավոր է՝ ինչ-ինչ պաշտպանություն: Իր հերթին, նշանակո՞ւմ է դա, որ Վաշինգտոնի հետ կապված հարցում Ալիևը Անկարայից այդքան էլ մեծ հույսեր չունի: Կամ՝ Ալիևն ունի տեղեկություն, որ վաշինգտոնյան նախաձեռնությունը արտացոլում է որոշակի ռուս-ամերիկյան գործակցություն, և փորձում է հոկտեմբերի 23-ից առաջ որոշակի ռևերանսներ անելով Մոսկվայի կողմ` խաթարել այդ գործակցությունը հնարավորինս:
Անի Ավագյան