Չեմ զբաղեցնի ավելորդ մահճակալ կամ շնչառական սարք, հանուն...
Ուշադրության կենտրոնումCOVID 19- ի երկրորդ ալիքի մասին խոսվում էր դեռ վաղուց: Գարնանը առողջապահության նախարար Արսեն Թորոսյանը ասում էր, որ աշնանը սպասվում է երկրորդ ալիք: Աշխարհի գրեթե բոլոր երկրները զերծ չմնացին կորոնավիրուսի երկրորդ ալիքից: Թեև այն ՀՀ-ում նահանջ էր ապրում, բայց… Սեպտեմբերի 27-ից ՀՀ-ում և ԱՀ-ում հայտարարվեց ռազմական դրություն: Պատերազմական գործողությունների արդյունքում, բազմաթիվ վիրավորներին բուժօգնություն ցուցաբերելու գործին լծվեց բուժանձնակազմի մեծ մասը և առողջապահության նախարարը հայտարարեց, որ արդեն պայքարելու են երկու ճակատով: Երկրում կարանտինային վերահսկողությունը բնականաբար թուլացավ, ուժայինների հսկողությունը բացակայում է, իսկ քաղաքացիներից շատերը օգտվեցին դրանից, հասարակական տրանսպորտը չի ենթարկվում կարանտինային կանոններին, դիմակի պատադիր կրումն էլ դարձել է ըստ ցանկության: Առողջապահության ոլորտի բազմաթիվ ներկայացուցիչներ և հենց նախարարությունը գրեթե ամեն օր կոչ է անում պահպանել հակահամաճարակային կանոնները՝ ի օգնություն բժիշկների և վիրավոր զինծառայողների: Այս կոչին, սակայն, ոչ բոլորն են ականջալուր լինում, դրա արդյունքում վարակվածների թիվը գերազանցում է 65 000-ը, մեկ օրում կատարված թեստերի դրական արդյունքն էլ՝ 1500-ը : Ազդեցիկ կոչով քաղաքացիներին դիմել է նաև ԱԺ նախկին նախագահ, բժիշկ Արա Բաբլոյանը. «… երբ մեր զինվորներն իրենց կյանքն են զոհաբերում՝ հանուն հայրենի հողի և մեր լինելիության, մենք պարզապես իրավունք չունենք թուլացնել մեր երկրորդ կարևոր ճակատը՝ առողջապահականը: Խնդրում եմ, թույլ տվեք ասել նաև՝ պահանջում եմ, խստորեն պահպանեք հակահամաճարակային կանոնները, գնահատեք Ձեր պատասխանատվության աստիճանն այս հարցում՝ ընդունելով, որ վիրավորներով գերծանրաբեռնված բժշկական կենտրոններում մեկ մահճակալ, մեկ թթվածնային սարք զբաղեցնելն այս օրերին ոչ միայն անցանկալի, այլև պարզապես անթույլատրելի է: Թույլ տվեք բժիշկներին կենտրոնանալ առավելապես մեր քաջարի զավակների կյանքերը փրկելու, նրանց առողջությունը վերականգնելու անգնահատելի գործին»: Բժիշկը, ով ամբողջ պայքարի ընթացքում իր ողջ բուժանձնակազմով լծվել է վարակված երեխաների բուժման գործին՝ կոչ է արել նաև հետևել մտերմիների և հարազտների պահվածքին՝ երկու ճակատներն էլ ամուր պահելու համար: «…պահեք սոցիալական հեռավորություն, կրեք դիմակ, հաճախակի ախտահանեք ձեռքերը և պահանջեք նույնը ձեր կողքիններից: Այսօր մեր վարքագիծն առավել քան կարևոր է՝ չթուլացնելու, հաղթանակած պահելու համար մեր ռազմական ու բժշկական ճակատները»,-ասված է կոչում: Նման կոչերի օրինակները բազմաթիվ են ականջալուր լինողներինը՝ քիչ: Այնուամենայնիվ, պետք է արձանագրենք, որ վերջին մեկ շաբաթվա ընթացքում, հոկտեմբերի 19-ին արձանագրվել է թվով ամենաքիչ վարակվածության ցուցանիշը: Պն ներկայացուցիչ Արծրուն Հովհաննիսյանը յուրաքանչյուր առավոտ հարց է տալիս, իսկ դու ի՞նչ ես անում հաղթանակի համար, գուցե յուրաքանչյուրի կողմից առաջին տեղում այսուհետ լինի այն, որ չեմ զբաղեցնում Արա Բաբլոյանի նշած մեկ ավելորդ մահճակալը կամ շնչառական սարքը, քանի որ այն պետք է….
Աննա Ավետիսյան