Բաքվի հերթական անսկզբունքայնությունը
Վերլուծություն
Այսօր ունենք այնպիսի իրավիճակ, որ Բաքուն երկրորդ անգամ չի պահում զինադադարի պայմանավորվածությունը, եւ դա հասկանալի է։
Ըստ էության՝ Բաքուն որևէ պատճառ չունի պատերազմը դադարեցնելու համար, քանի որ չի հասել իր հռչակած նպատակներին։ Մյուս կարևոր հանգամանքը Թուրքիան է, որը ձգտում է դառնալ հավասար խաղացող Հարավային Կովկասում, որի համար անհրաժեշտ է նրա ներգրավվածությունն այսպես կոչված կարգավորման գործընթացում։ Այս ամենին հավելենք, որ Բաքվի կողմից հայտարարվել է, որ իր կորուստների մասին կխոսի պատերազմից հետո, և այս ընթացքում, երբ Ադրբեջանում մեծանում են խուճապային տրամադրությունները, դիակների դուրսբերումն ավելի կխորացնի այդ խուճապը։ Ապշերոնյան հանցախմբի պարագլուխը ցանկանում է կորուստների մասին խոսել «հաղթանակի» համատեքստում, դրանք արդարացնելու համար։
Մոսկովյան զինադադարի պայմանավորվածությունից անմիջապես հետո Բաքվի ԱԳ նախարարը խոսել է Թուրքիայի իր գործընկերոջ հետ, որի ժամանակ շնորհակալություն է հայտնել Անկարայի դիրքորոշման համար։ Դա նշանակում է, որ Թուրքիան ըմբռնումով է մոտենում զինադադարի պայմանավորվածությանը` միաժամանակ պատերազմը շարունակելու խոստումով։
Իր հերթին Բաքվի ԱԳՆ խոսնակը հայտարարեց, որ զինադադարը չի նշանակում, որ պատերազմը չի շարունակվելու, եւ իրենք չեն ազատագրելու հողերը։ Պետք է արձանագրենք, որ Ալիևն իր հերթին խոստովանել է զինադադարը խախտելու հանգամանքը` ասելով, թե իրենց փորձում են ստիպել դադարեցնել պատերազմը։ Խաղաղություն պարտադրելու նախորդ երկու փորձերն, այսպիսով, փաստացի ապարդյուն են անցել։
Մի պահ կանգ առնենք, և հասկանանք, թե ի՞նչ ռեսուրս ունի Հայաստանը երրորդ և վերջնական պարտադրանքի համար, բացի զինված ուժերի հնարավորություններից։ Դրա համար կան մի շարք հանգամանքներ՝ Ադրբեջանի և ահաբեկության նույնացումը, որը տարածում գտավ ոչ միայն միջազգային ԶԼՄ-ներում, այլև պաշտոնական մակարդակներում, Արցախի միջազգային ճանաչման գիծը, հայկական դիվանագիտության կողմից հայկական հաղթանակի լայն ընդգրկման՝ Ռուսաստան-Թուրքիա-Արևմուտք հարաբերությունների թնջուկում համարժեք պատկերացումը և այլն։ Միաժամանակ, այս պայմաններում առաջնահերթն, իհարկե, հայկական զինուժի գործողություններն են, այնպիսի իրավիճակ ստեղծելով, որ բացառվեն պատերազմի հետագա հնարավորությունները։ Այլ տարբերակ Բաքուն ուղղակի չի թողնում։
Կարեն Սիմոնյան
1
2
3
4
5
1
4
5
1
2
3
5
