Պոպուլիստից՝ վարչապետ
ՎերլուծությունԱնկախության տոնին ընդառաջ Նիկոլ Փաշինյանը հրապարակեց իր պատկերացրած փոփոխությունների նոր ռազմավարությունը, որը շատ բանով հիշեցնում էր նրա ծրագրային դրույթները՝ արձանագրված բոլորովին վերջերս Անվտանգության խորհրդի նիստում ներկայացված ռազմավարության մեջ։ Ամենևին կասկած չունենք, որ այն շատ շուտով մոռացվելու է այնպես, ինչպես նախորդն է մոռացվել։ Մի բան, այնուամենայնիվ, երբեք չի մոռանում, ինչը նրա կերպարին ուղեկցում է մշտապես՝ կեղծելը, մանիպուլացնելը։
Իր «Դասախոսության» մի հատվածում Փաշինյանն ունկնդիրներին առաջարկեց պատկերացնել, որ ՀՀ անկախությունից հետո անցած շուրջ 30 տարին դարձել է մի օր։ Ն․ Փաշինյանի մտքերի շարունակությունն այնուհետ հետաքրքիր չէ, սակայն հետաքրքիր է, թե այդ մարդն ընդհանրապես, գոնե նվազագույն չափով պատկերացում ունի՞ մեր՝ 21-րդ դարի ժամանակի մասին, որն ամենևին էլ 20-րդ դարի, առավել ևս 19-րդ կամ նախորդ ոչ մի այլ դարի՝ ընթացքի արագությամբ միևնույն ժամանակը չէ։
Ակնհայտ է, որ աշխարհի ոչ մի երկրի լուրջ ղեկավար իրեն թույլ չի տա զբաղվել այնպիսի անհնարին գործով, ինչպիսին 30 տարվա հեռահարությամբ ռազմավարություն գրելն է։ Այդպիսի մեծ հեռահարություն կարող են վերցնել միայն աշխարհի գլոբալ հիմնախնդիրների լուծումները ծրագրելիս, օրինակ՝ գլոբալ տաքացում, օզոնի շերտ, կենսամիջավայր և այլն։ Իսկ այնպիսի ոլորտներ, ինչպիսիք են կոնկրետ երկրի տնտեսությունը, ժողովրդագրական միտումները, էլ չենք ասում՝ մշակույթը, սպորտը և այլն, եթե նույնիսկ ռազմավարական պլանավորման ենթարկվում էլ են, ապա ամենաշատը՝ 3 տարով։
Արդյո՞ք Փաշինյանն իսկապես չի պատկերացնում թվային այն ամբողջ անհեթեթությունը, որ հրապարակում է լրջությամբ։ Նա իրո՞ք այնքան պարզամիտ է, որ կարծում է, թե ՀՆԱ-ի յոթակի աճը կարող է բավարարել 2050 թվականի հայ քաղաքացուն, եթե այդ «թռիչքի» հիմքը և համեմատության եզրը այսօրվա խղճուկ տնտեսական վիճակն է։ Նա իսկապե՞ս լուրջ է, երբ ծրագրում է նույնիսկ անծրագրելի բաներ, օրինակ, որ մենք պիտի ունենանք 25 օլիմպիական չեմպիոն, դառնանք ֆուտբոլի աշխարհի առաջնության մեդալակիր և այլն։
Ցավով պետք է փաստել, որ մենք ամեն օր ենք վկայություններ ստանում այն մասին, թե այդ դաշտի ինչպիսի պրոֆեսիոնալ խաղացող է Նիկոլը, օր-օրի ավելի հմտացող, սակայն նա մոռացել է, որ իր համար անցանկալի փոփոխություններ է կրել նաև հանդիսատեսը։ Նա այլևս չի հավատում պոպուլիստին, որը, ավաղ, նաև վարչապետ է։
Վահագն Պողոսյան