Կա որոշակի պայմանավորվածություն, որը հասարակությունից գաղտնի է պահվում
ՎերլուծությունPressmedia.am կայքի զրուցակիցը փաստաբան Երվանդ Վարոսյանն է։
— Պարոն Վարոսյան, ինչպե՞ս եք գնահատում, որ վերջերս Ազգային ժողովը ՍԴ դատավորի երեք թեկնածուներին էլ հավանություն տվեց:
— Շարունակեց և որոշակի առումով նաև ավարտվեց այն հակասահմանադրական գործընթացը, որը սկսվել էր սահմանադրական դատարանի շուրջ։ Միաժամանակ ինձ համար ակնհայտ է, որ ԱԺ-ն չէր էլ կարող դեմ քվեարկել այդ թեկնածուներին այն պատճառով, որ իրենք իրենց իսկ ձևակերպած սահմանադրական փոփոխություններով այնպիսի ձևակերպումներ էին կատարել, որոնք կաշկանդում էին իրենց փոփոխությունները, չակերտավոր ուժի մեջ մտնելուց, երկու ամսվա ընթացքում առաջարկել թեկնածուն։ Կարծում եմ, որ եթե չքվեարկեին, ապա նոր թեկնածուների առաջադրումը ևս կլիներ խնդրահարույց։
— Կոռուպցիայի կանխարգելման հանձնաժողովն էլ էր հրապարակումներով ու բացահայտումներով հանդես եկել, բայց անգամ դա հետ չպահեց իշխանությանը: Ձեր կարծիքով, ո՞րն է պատճառը:
— Ես կարծում եմ, որ իրենց նման բաները չեն հետաքրքրում։ Թեկնածուների առաջադրվելուց արդեն իսկ որոշված էր, որ նրանք պետք է գնան սահմանադրական դատարան։ Կարծում եմ նաև, որ այդ առումով կար որոշակի պայմանավորվածություն, որը հասարակությունից գաղտնի է պահվում։ Մասնավորապես, այդ պայմանավորվածությունը բացահայտեց Ալեն Սիմոնյանը, երբ կանխորոշեց, որ ըստ իրեն բացառված է, որ նոր կազմը հնարավոր է Սահմանադրական դատարանի նախագահ ընտրի Հրայր Թովմասյանին։ Այդ մասին ինքը կարող էր իմանալ միայն թեկնածուներից կամ դատավորներից։
Լիա Ղազարյան