Ինչո՞ւ չեն վստահում քննիչ հանձնաժողովներին
ՔաղաքականությունԱԺ-ն քննարկում էր կորոնավիրուսի տարածումը կանխելու, այդ վիրուսի դեմ պայքարի հետևանքների մեղմման կամ վերացման ուղղությամբ ՀՀ կառավարության և պարետատան իրականացրած միջոցառումների արդյունավետությունը, ինչպես նաև արտակարգ դրության ժամանակահատվածում մարդու իրավունքների, հիմնարար ազատությունների սահմանափակումների արդյունավետությունը և իրավաչափությունն ուսումնասիրող ՀՀ ԱԺ-ի քննիչ հանձնաժողովի անդամների թիվը սահմանելու մասին որոշումը:
Ընդդիմության տեսակետը կրկին կոշտ էր: ԲՀԿ-ական պատգամավոր, ԱԺ Մարդու իրավունքների և հանրային հարցերի մշտական հանձնաժողովի նախագահ Նաիրա Զոհրաբյանին բարկացրել էր հատկապես այն, որ իմքայլական պատգամավորները հայտարարել էին, որ ընդդիմություը նպաստավոր պայմաններ է ստեղծել վիրուսի տարածման համար, բառացի հայտարարվեց, որ ընդդիմության անպատասխանատու քայլերի արդյունքում կորոնավիրուսը սրընթաց տարածվել է: Կոչ արեց քվեարկել և ստեղծել այդ հանձնաժողովը:
Զոհրաբյանի կարծիքով քննարկելու բազում հարցեր կան. «Մենք ձեզ հետ կքննարկենք միտինգների, և, այո՛, քարոզարշավի ժամանակ վարակվածների մասին, Իտալիայի անպատասխանատու ռեյսերի, կորոնավիրուսը պինցետով և արաղով ախտահանելու, հիմա լեռներում մագլցող նախարարի բազմաթիվ հայտարարությունները, կքննարկենք, թե ինչպես եղավ, որ Գյումրիի մահացած տատիկի դին հայտնվեց Նոր Հաճնում, ապա արտաշիրիմում արվեց, կքննարկենք մի քաղաքացու հայտարարություն, որ իր հարազատի դիակը տվել են՝ ատամնաշարը ջարդված … »:
Զոհրաբյանը հայտարարեց, որ չի լինելու տվյալ հանձնաժողովում, նախ նրա համար, որ կարող է պարզվի, որ ամեն ինչ հրաշալի է: «Եվ մենք ձեզ հետ միասին Արսեն Թորոսյանին, պարետին և մյուս պատասխանատուներին կհանձնենք արիության մեդալ՝ քովիդի դեմ պայքարը իմ սուբյեկտիվ կարծիքով տապալելու համար»:
ԱԺ «Լուսավոր Հայաստան» խմբակցության ղեկավար Էդմոն Մարուքյանն ասաց. «Հանձնաժողովի ստեղծումը լակմուսի թուղթ է, եթե այս որոշումը տապալվում է, ինձ համար ՀՀ-ն դադարելու է լինել ժողովրդավարական երկիր»: Էդմոն Մարուքյանն ասաց, որ հանձնաժողովի եզրակացությամբ կարող է ներկայացվել, որ ամեն ինչ իրավաչափ էր, կամ իրավաչափ չէր. «Կամ պետք է հանձնաժողովը տա պատասխան, որ ամեն ինչ լավ է ընթացել, կամ ասի, որ այս մասը վատ է արվել, և դրա պատասխանատուն այսինչ գերատեսչությունն է, խորհրդարանը՝ որպես քաղաքական մարմին, թող եզրակացություն անի, կարող է այդ զեկույցից հետո որոշի նախարար հանել, գերատեսչության ղեկավարի հանել, կարող է դա դառնալ քրեական գործ հարուցելու հիմք»:
Ինչո՞ւ ընդդիմադիր երկու ուժերը չեն վստահում քննիչ հանձնաժողովին: Ու՞ր են տանում տողատակերը: Դեռ ամիսներ առաջ ԱԺ-ում ստեղծվել էր Ապրիլյան պատերազմի հանգամանքներն ուսումնասիրող քննիչ հանձնաժողով: Այս նախ ստեղծվել էր 6 ամսով և երկարաձգվել դեկտեմբեր ամսին՝ ևս 6 ամսով: Այն պետք է եզրակացություն տա աշնանը: Ստեղծվելուն զուգահեռ՝ բոլորը վստահում և հավատում էին հանձնաժողովին, սակայն հավատը մարեց մինչ եզրակացությունը հրապարակելը: Գուցե խնդիրը թաքնված է այնտեղ, որ հանձնաժողովի նախագահ Անդրանիկ Քոչարյանը այդպես էլ որևէ առարկայական պատասխան դեռ չի տվել՝ չնայած լրագրողների բազում հարցերին:
Աննա Ավետիսյան