Արցախի Հանրապետության նախագահ Արայիկ Հարությունյանը հուլիսի 20-ին ԱՀ առողջապահության նախարարության աշխատակիցներին է ներկայացրել նորանշանակ նախարար Արարատ Օհանջանյանին:
Երկրի ղեկավարը շնորհակալություն է հայտնել Արայիկ Բաղրյանին ոլորտը տեւական ժամանակ արդյունավետորեն ղեկավարելու համար եւ հաջողություններ մաղթել Արարատ Օհանջանյանին՝ հատկապես այս ծանր՝ համավարակային պայմաններում այդ պատասխանատու պաշտոնում նշանակվելու կապակցությամբ:
Արայիկ Հարությունյանը մեկ անգամ եւս շեշտել է, որ հանրապետությունում անվճար եւ որակյալ առողջապահական համակարգ ունենալը նախագահի ծրագրի առաջնային սկզբունքներից է: Սակայն, նախագահի խոսքով, բարեփոխումների ճանապարհին ոլորտում պետք է բացառել բոլոր տեսակի կոռուպցիոն երեւույթները, ինչպիսիք են՝
դեղերի ու սարքավորումների ձեռքբերման, դեղատոմսերի դուրս գրման գործընթացում կաշառքի գործոնը,
լաբորատոր ախտորոշիչ հետազոտությունների ուղղորդված ուղեգրումը:
Նախագահ Հարությունյանը հավաստել է, որ գործընթացն իրականացվելու է ԱԱԾ վերահսկողության ներքո, եւ ովքեր չհետեւեն վերոնշյալ ցուցումներին, ենթարկվելու են խիստ պատասխանատվության: Այս ամենին զուգահեռ, նախագահի խոսքով, աշխատանքի նախապայմաններ կհանդիսանան հետեւյալ ուղենշային կետերը՝
հիվանդների նկատմամբ բոլոր հանգամանքներում բարյացակամ վերաբերմունքի ցուցաբերումը,
հետազոտման եւ բուժման միզազգային գործելակարգերի (պրոտոկոլների) պարտադիր ներդնումը,
ոլորտում որոշումներ կայացնելիս կոլեգիալ սկզբունքի ապահովումը,
այն հետազոտությունների ցանկի հստակեցումը, որոնք Արցախում չեն իրականացվում:
Հանրապետության նախագահը նշել է նաեւ, որ բուժաշխատողների սոցիալական երաշխիքների ապահովումը երկրի ղեկավարության կողմից վարվող քաղաքականության գլխավոր խնդիրներից է: Այդ համատեքստում հատկանշական է ոլորտի աշխատակիցների աշխատավարձերի բարձրացման հանգամանքը, որի առաջին փուլը նախատեսվում է սեպտեմբերին, երկրորդը՝ գալիք տարվա հունվարին:
1
2
3
4
5
1
2
3
5
3
5
