Դատախազությունն ամեն ինչ անում է, որ քրգործն ուշ հարուցվի. Արամ Վարդանյանի պաշտպանների բողոքի քննությունը հետաձգվեց

Երեւանի ընդհանուր իրավասության դատարանում՝ դատավոր Գագիկ Պողոսյանի նախագահությամբ, այսօր՝ հունիսի 24-ին շարունակվում էր «Վստրեչի Ապեր» անունով հայտնի՝ Արամ Վարդանյանի տան խուզարկության վերաբերյալ բողոքի քննությունը։

Արամ Վարդանյանի փաստաբան Լուսինե Սահակյանը դատարանին հայտնեց, որ Վարդանյանի տան խուզարկության վերաբերյալ գործի նյութերն իրենք թերի են ստացել Դատախազությունից։

«Դատախազն ասում է, որ նյութերում եղել է նաեւ ձերբակալման որոշում, սակայն մեզ տրամադրված նյութերում դրանք չկան։ Մեզ համար անհասկանալի է, թե ինչու են փակվել ինֆորմացիաները, այսինքն՝ ուղղակի ջնջված է ինֆորմացիան։ Սկզբի հատվածում ինֆորմացիան փակ է, սակայն տեքստում բացահայտված են մարդկանց անուններ։ Այսինքն՝ եթե իրենք ուղղակի ցանկացել են անձնական տվյալներ փակել, ապա պետք է ամբողջը փակված լիներ, չնայած իրավունք չունեին փակելու, որովհետեւ այդ դեպքում անիմաստ է այդ նյութերը տրամադրելը։ Մենք ունենք բազմաթիվ ինֆորմացիաներ, թե ովքեր են եղել այնտեղ եւ եթե այստեղ փակվում է ինֆորմացիան, մենք չենք կարողանում հարց բարձրացնել, որ, օրինակ, եկած Պողոսին կամ Մարտիրոսին չեք լսել։ Ճիշտ կլինի, որ դատախազը տրամադրի ու դատախազը չպետք է որոշի՝ ինչը կրճատել։ Ինձ համար տարօրինակ է, որ դատախազն ասում է՝ ոստիկանությունը տրամադրել է որոշակի սահմանափակումներով. որտեղի՞ց դատախազը գիտի, թե մեզ ինչ է տրամադրվել, սա հարց է։ Այնուամենայնիվ, մենք Արամ Վարդանյանի գործի պարագայում մենք այլեւս ոչնչի վրա չենք զարմանում»,- ասաց Լուսինե Սահակյանը։

Դատավոր Գագիկ Պողոսյանը դիմեց գործով դատախազին. «Տեսեք՝ ինչ է տեղի ունենում։ Ես նիստ եմ կորցնում ավելորդ։ Հետեւաբար, պատասխանատվությունը ձեր վրա է, դուք պետք է պատրաստ լինեք բողոքի քննությանը»։

«Պետք է ոստիկանությունից նյութերի կեսն էլ ստանամ, որ տրամադրեմ»,- ասաց դատախազը։

«Այսինքն՝ դուք չե՞ք կարողանում եւ Ոստիկանությունը ձեր փոխարեն պետք է որոշի, թե դուք բողոքի քննությանն ինչ ներկայացնե՞ք»,- ասաց դատավորը։

Դատախազը դատարանին միջնորդություն ներկայացրեց՝ գործի քննությունը հետաձգելու մաիսին։

Փաստաբաններն առարկեցին միջնորդության դեմ.

«Քանի որ դեռեւս գտնվում ենք քրեական գործի հարուցման փուլում, ուղղակի չեմ կարողանում պատկերացնել, թե ինչպես պետք է այդ նյութերը, որոնք Դատախազությունը համարում է քրեական գործի հարուցման նախապատրաստման հատված, ինչու պիտի ինչ-որ բան կրճատվի։ Եթե դատախազը հարկ է համարել անհատական տվյալներ փակել ու դրա համար պիտի դիմի Ոստիկանություն, ապա կոչ կանեի, որ Ոստիկանությանը դիմեն՝ առավել ուշադիր լինեն։ Մեզ տրամադրված նյութերում շատ անձնանց անուններ է փակված, բայց որտեղ որ պետ է մոռացել են փակել, թեպետ դա մեզ միեւնույն է։ Մեզ պետք է, որ փաստի առթիվ կատարվի պատշաճ քննություն եւ մեղավորները ենթարկվեն պատասխանատվության՝ անկախ նրանից՝ իրենք եղել են դիմակով թե անդիմակ»,- ասաց Արամ Վարդանյանի փաստաբան Երվանդ Վարոսյանը։

Փաստաբան Սահակյանն էլ նշեց, որ իրենք հասկանում են՝ Դատախազությունն ամեն ինչ անում է, որ քրեական գործը ուշ հարուցվի. «Ամեն ինչ անելու են, որ չհարուցվի։ Նկատի ունենալով գործի բնույթը՝ այն հանգամանքը, որ ուշացնելով քրեական գործի հարուցումն արդեն իսկ պետությունը կանգնում է լրջագույն խնդրի առաջ, որովհետեւ կան հոդվածներ, որոնցով անհապաղությունը պարտադիր է այդ քրեական գործի հարուցման համար։ Դատախազի ասածն այն է, որ ինքը պետք է թույլտվություն վերցնի Ոստիկանությունից, որպեսզի կարողանա բացահայտել որոշ ինֆորմացիաներ։ Ամեն ինչ չի կարող Արամ Վարդանյանի համար յուրահատուկ լինել, որովհետեւ պրակտիկան ցույց է տալիս, որ առանձնահատուկ եւ խտրական մոտեցում կա կոնկրետ Արամ Վարդանյանի գործի տարբեր դրվագներով»։

Դատավորը բավարարեց դատախազի միջնորդությունը։ Բողոքի քննությունը նշանակվեց հուլիսի 21-ին, ժամը՝ 15։30-ին։

Հիշեցնենք, որ 2020թ. մարտի 4-ի գիշերը՝ ժամը 02.40-ի սահմաններում, ոստիկանության հարյուրավոր աշխատակիցներ մտել էին Արամ Վարդանյանին եւ նրա հարազատներին պատկանող Արցախի փողոցի 17 հասցեում գտնվող տներ։

Կատարված գործողությունների արդյունքում բերման էին ենթարկել Արամ Վարդանյանի որդուն եւ 2 քաղաքացու, 2 քաղաքացի էլ ձերբակալվել է, որից մեկը Վարդանյանի եղբորորդին է, մյուսը՝ հարեւանը:

Նշենք, որ տան խուզարկությունը շարունակվում էր նաեւ հաջորդ օրը։ Վարդանյանի փաստաբաններ Երվանդ Վարոսյանին եւ Լուսինե Սահակյանին քննիչները ներկայացրել էին տանը խուզարկությունն իրականացնելու դատարանի որոշումը։ Ըստ որոշման բովանդակության՝ նրանք Վարդանյանի տանը փնտրում էին զենք-զինամթերք, չգտնելով նմանատիպ իրեր, վերցրել են Վարդանյանի անձնական կյանքին վերաբերող տեսաերիզներ։

Հիեցնենք, որ ՔԿ-ն հայտնել էր, որ Արամ Վարդանյանին որպես մեղադրյալ ներգրավվելու մասին որոշում է կայացվել եւ նրա նկատմամբ հայտարարվել է հետախուզում։ Նրան մեղադրում են Էմիր Արամյանի կողմից 2016 թվականին կատարված կողոպուտը կազմակերպելու, 2019 թվականին նույն Էմիլի առեւանգումը կազմակերպելու, ապա 2020 թվականի մարտի 4-ին նրա նկատմամբ սպանության փորձ կատարելու մեջ։

Ըստ ՔԿ-ի հաղորդագրության՝ 2020թ. մարտի 5-ին առերեւույթ հանցագործություններ կատարելու համար Վարդանյանի եղբոր որդի Ա.Վ.-ին մեղադրանք է առաջադրվել ՀՀ քրեական օրենսգրքի 131-րդ հոդվածի (մարդուն առեւանգելը) 1-ին մասով, իսկ Ս.Կ.-ին՝ ՀՀ քրեական օրենսգրքի 176-րդ հոդվածի (կողոպուտ) 3-րդ մասի 1-ին կետով։