Սոցիալ-հոգեբանական աջակցություն աշակերտներին, ուսուցիչներին և ծնողներին՝ Ասիական զարգացման բանկի հետ համագործակցությամբ
ՀՀ կրթության, գիտության, մշակույթի եւ սպորտի նախարարությունը եւ Ասիական զարգացման բանկը (ADB) կորոնավիրուսի տարածմամբ պայմանավորված արտակարգ դրության եւ հեռավար կրթության պայմաններում աշակերտներին, ուսուցիչներին եւ ծնողներին սոցիալ-հոգեբանական աջակցության տրամադրման նպատակով սկսում է նոր դրամաշնորհային ծրագիր։
Հայաստանում գործող մասնագիտացված հասարակական կազմակերպություններին ուղղված դրամաշնորհային ծրագրի միջոցով կբացահայտվեն հեռավար կրթության պայմաններում աշակերտների, ուսուցիչների եւ ծնողների մոտ ի հայտ եկող հիմնական հոգեբանական խնդիրները, կձեւավորվի այդ իրավիճակում սոցիալ-հոգեբանական աջակցության տրամադրման արդյունավետ գործիքակազմն ու մեթոդաբանությունը եւ կտրամադրվեն անհրաժեշտ աջակցության ծառայությունները:
Մասնավորապես, առաջնային են հատուկ ուղերձ-խորհուրդների մշակումը՝ ուղղված երեխաներին, ծնողներին, ուսուցիչներին, առցանց հոգեբանական աջակցության հարթակների եւ ռեսուրսների ձեւավորվումը, երեխաների, ծնողների, ուսուցիչների հարցերին արձագանքելու, հոգեբանական աջակցություն տրամադրելու համար թեժ գծերի ստեղծումը կամ արդեն գործողների վերաձեւավորումը:
Այս ծրագրի իրականացումը կօգնի նաեւ հզորացնել դպրոցական համակարգում հոգեբանական ծառայությունները՝ աշակերտներին եւ ծնողներին շարունակական աջակցություն ցուցաբերելու, կրթության կազմակերպման համատեքստում նախկին ռիթմը պահպանելու, ինչպես նաեւ ճգնաժամային իրավիճակով պայմանավորված սթրեսները նվազեցնելու նպատակով: Առաջնային է նաեւ կրթության առանձնահատուկ պայմանների կարիք ունեցող երեխաների եւ նրանց ծնողների հեռավար կրթության մեջ ընդգրկվածության բարձրացումը, որը փոխկապակցված է երեխայի կրթական կարիքով պայմանավորված հոգեբանական խնդիրների հաղթահարման հետ:
Նշենք, որ Ասիական զարգացման բանկը Հայաստանում կրթության ոլորտի զարգացման հիմնական գործընկերներից է եւ շարունակում է օժանդակել այն ոլորտներին, որոնք ՀՀ կառավարության բարեփոխումների օրակարգում ունեն գերակայություն:
1
2
3
4
5
2
3
4
2
3
4
5
