ԱՀԿ-ում հայտնել են, որ աշխարհում ընթանում են կորոնավիրուսի դեմ շուրջ 20 պատվաստանյութի մշակման աշխատանքներ

Նոր տիպի կորոնավիրուսի դեմ շուրջ 20 պատվաստանյութ է մշակվում աշխարհում տվյալ պահին: Այդ մասին մամուլի ասուլիսի ժամանակ հայտարարել է ԱՀԿ փորձագետ Մարիա վան Քերհոուվը, հաղորդում է ՏԱՍՍ-ը:

«Ամբողջ աշխարհում գիտահետազոտական կենտրոններն արագացնում են կորոնավիրուսի դեմ պատվաստանյութ ստեղծելու ուղղությամբ աշխատանքները,-նշել է նա:- COVID-19 կորոնավիրուսային հիվանդության դեմ առնվազն 20 պատվաստանյութ է մշակվում ներկայում: Դրանց առաջին կլինիկական փորձարկումներն արդեն մեկնարկում են»:

«Որոշ ժամանակ կպահանջվի կիրառման ենթակա պատվաստանյութն ունենալու համար, սակայն աշխատանքներն ընթացքի մեջ են, եւ մենք շատ երախտապարտ ենք բոլոր գործընկերներին, որոնք անցկացնում են այդ կլինիկական փորձարկումները»,-ընդգծել է փորձագետը:

«Միակ բանը, որը կարող է վատ վիրուսից վտանգավոր լինել, վատ պատվաստանյութն է,-ասել է արտակարգ իրավիճակների հարցերով ԱՀԿ ծրագրի տնօրեն Մայքլ Ռայանը:-Մենք պետք է շատ զգույշ լինենք ցանկացած պրոդուկտ մշակելիս, որը մենք կներարկենք մոլորակի բնակչության մեծամասնությանը: Փաստը, որ հիվանդության բռնկումից սկսած 8 շաբաթ անց պատվաստանյութն արդեն ներարկվում է առաջին կամավորներին, վկայում է այն մասին, որ աշխատանքներն իսկապես տարվում են աննախադեպ արագությամբ»:

«Սակայն առաջիկայում մենք կբախվենք մեկ ուրիշ բարդ իրավիճակի հետ,-շարունակել է Ռայանը:-Եթե մեզ հաջողվի մշակել արդյունավետ պատվաստանյութ, մենք պետք է ապահովենք, որպեսզի այն հասանելի լինի բոլորին: Ոչ միայն էթիկական տեսանկյունից, այլ նաեւ այն առումով, որ աշխարհը կարող է պաշտպանված լինել, միայն եթե բոլորը պաշտպանված լինեն»: Իսկ դա նշանակում է, որ արդեն պետք է մտածել, թե ինչպես մեծացնել այդ պատվաստանյութի արտադրության ծավալները, ինչպես ֆինանսավորել այդ գործընթացը, ինչպես ապահովել աշխարհում բոլոր մարդկանց դրանով եւ համոզել նրանց պատվաստվելու անհրաժեշտության մեջ:

Նոր կորոնավիրուսի բռնկումը գրանցվել էր 2019 թվականի դեկտեմբերի վերջում Կենտրոնական Չինաստանում, ավելի ուշ տարածվել էր ավելի քան 140 երկրում եւ Առողջապահության համաշխարհային կազմակերպության կողմից ճանաչվել որպես պանդեմիա: Վերջին տվյալներով՝ աշխարհում վարակվել է ավելի քան 230 հազար մարդ, գրանցվել է շուրջ 10 հազար դեպք մահվան ելքով: Ռուսաստանում գրանցվել է վարակման 253 դեպք: