«Ոչ»-ի քարոզչությունը թարմության կարիք ունի

Արման Ալավերդյանը ֆեյսբուքյան իր էջում գրում է .

ՀՀ ներքաղաքական դաշտում ներկայումս ստեղծվել է հետաքրքրական իրավիճակ, որը պայմանավորված է սահմանադրական փոփոխությունների գործընթացով: Սահմանադրական փոփոխությունների վերաբերյալ իրենց դիրքորոշումներով դաշտը բաժանվել է երկու հատվածի` «Այո»-ի կոմնակիցները և իր խայտաբղետ կառուցվածքով ներկայացող «Ոչ»-ի ճակատները:

«Ոչ»-ի ուղեծրում գործող ուժերը փորձեր են անում ստեղծել իրենց գործողությունները կոորդինացնելու մի շարք հարթակներ, սակայն այդպես էլ նրանց, հաշվի առնելով առկա որոշակի մարտավարական տարաձայնություններ, չի հաջողվում ստեղծել միասնական կառույց, որը թույլ կտա մի կետից կոորդինացնել իրենց քայլերը: Արդյունքում «Ոչ»-ի դաշտում գործում են մի կողմից «Նոր Հայաստան» փրկության ճակատը, ՀԱԿ-ի և ՀԺԿ-ի միասնական «Ոչ»-ի ճակատը, իսկ մյուս կողմից քաղաքացիական մի շարք նախաձեռնություններ՝ ներառյալ «Չեք անցկացնի նախաձեռնությունը: Մեկ այլ հարթակում գործում է «Ոչ»-ի դիրքորոշում որդեգրած «Հայկական վերածնունդ» հասարակական-քաղաքական միավորումը՝ ՕԵԿ-ի գլխավորությամբ, որը գործուն քայլերի չի դիմում և տպավորություն է առաջանում, թե «Հայկական վերածնունդը» գործում է սպասողական դիրքերից: «Ոչ»-ի պասիվ պայքարի կողմնակիցների շարքին կարելի է դասել նաև «Քաղաքացիական պայմանագիր» կուսակցությունը, որն ավելի շատ կողմնակից է և քաղաքական դաշտ է փորձում ներբեռնել ինստիտուցիոնալ ընդդիմության գաղափարը` վկայակոչելով, որ միայն այդ պարագայում կարելի կլինի հասնել որոշակի հաջողության: