Կան պատգամավորներ, որոնք իրենց գործառույթներին ծանոթ չեն. Աճեմյան

Ազգային ժողովում Մարդու իրավունքների պաշտպանի տարեկան զեկույցի խորհրդարարանական քննարկումներ այս տարի առանձնացան նրանով, որ ՀՀԿ-ական որոշ պատգամավորներ աչքի ընկան սուր քննադատություններով, ավելին՝ առավելապես քննադատության ենթարկվեց ոչ թե բուն զեկույցը, այլ քննադատություններն ուղղված էին Մարդու իրավունքների պաշտպան Կարեն Անդրեասյանի հասցեին: ՀՀԿ-ական Մարգարիտ Եսայանը ՄԻՊ-ի պաշտոնավորության չորս տարի անց միայն իր ելույթում հիշեց, որ իր նախընտրած օմբուդսմենը պետք է լինի տարեց, չորը թացից հասկացող և փորձառու, ՀՀԿ-ական Սամվել Ֆարմանյանն էլ իր ելույթում նույնիսկ անցավ հեգնական ու ծաղրական տոնայնությամբ վիրավորանքների: PressMedia.am-ը ՀՀԿ-կան պատգամավոր Կարինե Աճեմյանից հետաքրքրվեց, թե արդյոք այս տարվա զեկույցն էր այդքան խնդրահարույց, թե որևէ այլ միտում կար:

«Անկեղծ ասած, որևէ միտում չեմ տեսնում, անցյալ տարիներին էլ տարբեր տեսակետներ են եղել, ինչը նորմալ եմ համարում, այս անգամ, սակայն, հնչեցին շատ հակասական դիրքորոշումներ: Պատգամավորն ազատ է իր դիրքորոշում արտահայտելու կապակցությամբ, միակ անընդունելի բանը՝ անձը վիրավորելն է, որը համարում եմ սխալ: Ազգային ժողովը քաղաքական ամբիոն է, որում պետք է հնչեն միայն քաղաքական հայտարարություններ»,- մեկնաբանեց պատգամավորը՝ հիշեցնելով, որ ՀՀԿ-ի դիրքորոշումը զեկույցի նկատմամբ եղել է դրական, որն էլ խմբակցության անունից ելույթով արտահայտել է ՀՀԿ-ական Խոսրով Հարությունյանը:

Պատասխանելով հարցին, թե արդյոք քննադատությունը պայմանավորված է անձերով՝ Կարինե Աճեմյանն ասաց, որ հնարավոր է, որ մեկի համար Կարեն Անդրեասյանի անձը ընդունելի լինի, մեկի համար՝ ոչ:

«Կարծում եմ, որ չի կարելի անձերով պայմանավորված հեղինակազրկել Մարդու իրավունքների պաշտպանի ինստիտուտը: Ինքս համարում եմ, որ Կարեն Անդրեասյանը բարձրացրել է այդ ինստիտուտի հեղինակությունը, ոչ թե հակառակը՝ հեղինակազրկել: Այո՛, պատգամավորների մոտ ՄԻՊ-ի անձի, գործառույթների մասին պատկերացումները տարբեր են, դրանից ելնելով՝ մենք տեսանք այն, ինչ տեսանք: Ինձ թվում է կան պատգամավորներ, որոնք իրենց գործառույթներին ծանոթ չեն, ես համարում եմ, որ պատգամավորը պետք է իր գործառույթների և իրավասությունների շրջանակներում մնա»,- ասաց Աճեմյանը: Անդրադառնալով մամուլում հնչած տեսակետներին, թե տեղի ունեցածի հետևանքով Կարեն Անդրեասյանը հնարավոր է հրաժարվի օմբուդսմենի պաշտոնից՝ պատգամավորը տեսակետը հայտնեց, որ Անդրեասյանի ամփոփիչ ելույթում նման երանգներ չկային: Ըստ նրա, այլ հարց է, թե ժամկետի ավարտից հետո ում թեկնածությունը կառաջադրեն և ում կհաստատեն այդ պաշտոնում: Խոսելով Անդրեասյանի գործունեության մասին՝ Աճեմյանը վստահեցրեց, որ այդ ՄԻՊ-ի նկատմամբ վստահությունը մեծացել է, թե օմբուդսմենը և թե կառույցը շատ հարցերում կարողանում են արագ արձագանքել, օգնություն և խորհրդատվություններ տրամադրել: Այդ է պատճառը, որ պատգամավորն անընդունելի է համարում կառույցի նկատմամբ պատգամավորների ծայրահեղ մոտեցումները:

Լիլիթ Լալայան