Ադրեբաջանի ԱԱՆ ռազմական հակահետախուզության պետը պաշտոնանկ է արվել
Header
Ադրբեջանի նախագահ Իլհամ Ալիեւի հրամանագրով հոկտեմբերի 17-ին երկրի Ազգային անվտանգության նախարար Էլդար Մահմուդովի խայտառակ պաշտոնանկությունից անմիջապես հետո նախարարության աշխատակիցների նկատմամբ սկսված քրեական գործով արդեն 15 մարդ է ձերբակալվել:
Ինչպես հաղորդում են ադրբեջանական ԶԼՄ-ները, ԱԱՆ պաշտոնակատար Մադաթ Գուլիեւի հրամանագրով երեկ պաշտոնանկ է արվել ԱԱՆ ռազմական հակահետախուզության վարչության պետ Նիզամի Շիրինովը:
Նիզամի Շիրինովը երկար ժամանակ ծառայել է Ադրբեջանի ազգային անվտանգության նախարարությունում, իսկ մինչ այդ նա հանդիսացել է Ադրբեջանի նախագահին կից Հատուկ վարչության աշխատակից:
Նախօրեին զբաղեցրած պաշտոններից հեռացվել էին ԱԱՆ 9 բարձրաստիճան աշխատակիցներ, այդ թվում` 4 գեներալ:
ԱԱՆ աշխատակիցներին զուգահեռ, ձերբակալվածների մեջ են նաեւ Կապի եւ բարձր տեխնոլոգիաների նախարարության նախկին աշխատակիցներ, որոնք կասկածվում են Ադրբեջանի բարձրաստիճան պաշտոնյաների` այդ թվում նախագահի եւ նրա ընտանիքի անդամների հեռախոսների գաղտնալսման մեջ:
Բոլոր ձերբակալվածները պահվում են արդարադատության նախարարության Բաքվի թջվ 1 հետաքննչական մեկուսարանում:
Անդրադառնալով Էլդար Մահմուդովին աշխատանքից հեռացվելու պատճառին` մասնավորապես moderator.az կայքը գրել էր, որ գլխավորապես դա կապված է այն բանի հետ, որ ձերբակալված աշխատակիցները Էլդար Մահմուդովի հանձնարարությամբ լսել են Ադրբեջանի նախագահի, նրա ընտանիքի անդամների, ինչպես նաեւ իշխանության բարձրաստիճան անձանց եւ նրանց ընտանիքների հեռախոսային խոսակցությունները, ինչը, սովորաբար արվում է երկրում «հեղաշրջում» իրականացնելուց առաջ:
Ադրբեջանական ԶԼՄ-ները ԱԱՆ-ը 11 տարի ղեկավարած Էլդար Մահմուդովի պաշտոնանկության հնարավոր պատճառներից են համարում նաեւ երկրի Միջազգային բանկի նախկին ղեկավար Ջահանգիր Հաջիեւի հետ կոռուպցիոն կապերը, սեփական ապօրինի բիզնեսները եւ այլն:
«Ազադլըգ» թերթն էլ գրել է, որ «բոլոր դեպքերում, ԱԱՆ երկարամյա ղեկավարին «հարվածելը» ցույց է տալիս, որ իշխանության ներսում խարդավանքներն ուժգնանում են, եւ ներիշխանական խմբավորումների միջեւ պայքարը հասել է գագաթակետին»:
1
2
3
4
5
1
2
3
1
2
3
5
