8 վտանգավոր խնդիր, որոնք կարող են դառնալ անբացատրելի կապտուկների առաջացման պատճառ
LifeԺամանակ առ ժամանակ մարմնի տարբեր հատվածներում կապտուկների առաջացումը կարող է բնական երևույթ լինել, եթե դրանք պայմանավորված են որևէ վնասվածքով, սակայն լինում են դեպքեր, երբ մարդիկ պարզապես չեն հասկանում, թե ինչը կարող էր դառնալ կապտուկի առաջացման պատճառ: Որոշ դեպքերում կապտուկները պայմանավորված են լինում վտանգավոր հիվանդություններով, ուստի հարկավոր է շատ զգոն լինել ու կասկածների դեպքում անմիջապես բուժզննում անցնել:
Մասնագետները ներկայացրել են այն գործոնները, որոնք կարող են դառնալ կապտուկների առաջացման պատճառ:
Վիտամին C-ի դեֆիցիտ
Կապտուկներն առաջանում են մազանոթների թուլացման ու պատռման հետևանքով, իսկ ամերիկացի գիտնականների անցկացրած հետազոտությունները ցույց են տվել, որ մազանոթները կարող են թուլանալ վիտամին C-ի դեֆիցիտի պատճառով: Միևնույն ժամանակ բավարար քանակությամբ վիտամին C-ն ամրապնդում է անոթները՝ կանխելով կապտուկների առաջացումը: Սա նշանակում է, որ այս տարրի մակարդակն օրգանիզմում անմիջականորեն ազդում է կապտուկների առաջացման հավանականության վրա
Տարիքը
Տարիքի հետ մարդու մաշկը կորցնում է ճարպային շերտի զգալի մասը, մինչդեռ այդ ճարպը բարձի նման պաշտպանում է հարվածներից: Բացի այդ, տարիների ընթացքում մաշկի առաձգականության համար անհրաժեշտ կոլագենի արտադրությունը նվազում է, ինչի հետևանքով մաշկը բարակում է ու դառնում ավելի զգայուն բացասական ազդեցության նկատմամբ: Սա է պատճառը, որ տարիքի հետ կապտուկներ ավելի հաճախ են ի հայտ գալիս:
Արյան հիվանդություններ
Այնպիսի վտանգավոր հիվանդությունները, ինչպիսին են հեմոֆիլիան կամ լեյկոզը, նույնպես կարող են դառնալ անբացատրելի կապտուկների առաջացման պատճառ, ինչը պայմանավորված է լինում արյան մակարդման հետ կապված խնդիրներով: Սա է պատճառը, որ արտասովոր կապտուկների ի հայտ գալու դեպքում հարկավոր է անպայման բուժզննում անցնել՝ հատկապես, եթե դրանք անսպասելի են առաջանում:
Շաքարային դիաբետ
Շաքարային դիաբետով հիվանդների մաշկը շփման հատվածներում (պարանոց, թևատակեր, աճուկային հատված, ծալքերի հատվածներ և այլն) հաճախ ստանում է ավելի մուգ երանգ, և այդ մուգ հետքերը մարդիկ հաճախ շփոթում են կապտուկների հետ: Իրականում նման պիգմենտային հետքերը պայմանավորված են լինում ինսուլինի նկատմամբ կայունությամբ:
Ֆիզիկական գերլարվածություն
Ինտենսիվ մարզումների ժամանակ կամ ծանրություն բարձրացնելու դեպքում մկանների գերլարվածությունը նույնպես կարող է հանգեցնել կապտուկների առաջացման: Բանն այն է, որ նման ծանրաբեռնվածությունը կարող է հեշտությամբ դառնալ անոթների վնասվածքների ու պատռվածքների պատճառ, ինչն էլ կարող է հանգեցնել անբացատրելի կապտուկների առաջացման:
Որոշակի դեղորայքի գործածություն
Այնպիսի դեղամիջոցների գործածությունը, ինչպիսին են ասպիրինը, հակամակարդիչներն ու հակաթրոմբային միջոցները, ազդում է արյան մակարդելիության վրա՝ բարձրացնելով կապտուկների առաջացման հավանականությունը: Բացի այդ, արյունատար անոթների պատերի թուլացման ու դրա հետևանքով կապտուկների առաջացման պատճառ կարող են դառնալ նաև այնպիսի դեղամիջոցները, ինչպիսին են պրեդնիզոնը, պրեդնիզոլոնն ու հորմոնալ հակաբեղմնավորիչ դեղահաբերը:
Արևի ազդեցությամբ պայմանավորված վնասվածքներ
Արևի ճառագայթները շատ կարևոր են մարդու համար, քանի որ դրանց ազդեցության ներքո է օրգանիզմը վիտամին D սինթեզում, որն օրգանիզմի համար ամենակարևոր տարրերից մեկն է, սակայն արևի տակ չափազանց երկար ժամանակ անցկացնելը կարող է վտանգավոր լինել: Հատկապես վտանգավոր են արևային այրվածքները, քանի որ սա կարող է հանգեցնել մաշկի ճկունության ու ամրության կորստին, ինչն էլ կդառնա հաճախակի կապտուկների առաջացման պատճառ:
Վատ սննդակարգ
Սննդակարգը, որը չի տալիս մարդուն անհրաժեշտ սննդարար նյութերը, նպաստում է մազանոթների թուլացմանն ու դարձնում է դրանք շատ ավելի փխրուն: Մազանոթներն ավելի ամուր ու ճկուն դարձնելու լավագույն միջոցների մեկը ֆլավոնոիդներով հարուստ մթերքի գործածությունն է, իսկ այս կարևոր տարրերով հարուստ են մուգ գույնի հատապտուղները, մուգ գույնի տերևավոր բանջարեղենը, սոխն ու սխտորը: Եթե կապտուկները պայմանավորված չեն վնասվածքներով կամ ծանր հիվանդություններով, ապա բոլոր անհրաժեշտ միկրոտարրերով հարուստ սննդակարգը բավական կլինի կապտուկների առաջացումը կանխելու համար:
1
2
3
4
5
1
2
3
4
5
