ՌԴ-ն Վալերի Պերմյակովի գտնվելու վայրը անձնական տվյալ է համարում

Armtimes.com-ը գրում է․

Ռուսաստանի Քրեական պատիժն իրականացնող դաշնային ծառայությունը մերժեց տեղեկատվություն տրամադրել դատապարտյալ Վալերի Պերմյակովի վերաբերյալ՝ հղում անելով Ռուսաստանի «Անձնական տվյալների մասին» օրենքին:

ՀԺ-ի ուղարկած հարցման մեջ խնդրել էինք տեղեկատվություն տրամադրել այն մասին, թե Ռուսաստանի Դաշնության որ քրեակատարողական հիմնարկում է կրում իր պատիժը դատապարտյալ Պերմյակովը, նրա նկատմամբ ընդհանուր խստացված, թե հատուկ ռեժիմով է իրականացվում պատիժը, ինչպես է գնահատում համապատասխան բուժանձնակազմը դատապարտյալի առողջական վիճակը:

«Անձնական տվյալների մասին« ՌԴ օրենքում, սակայն, հատուկ նշում չկա դատապարտված անձանց վերաբերող տվյալների մասին, ինչպես նաեւ այն մասին, թե արդյոք մեր նշած հարցադրումների պատասխանը կարող է դասվել «անձնական տվյալներ» տեսակին: Օրենքի միայն առաջին հոդվածի երրորդ կետն է, որը այս կամ այն կերպ առնչվում է դատական մարմիններին, եւ որտեղ ասվում է, թե «Անձնական տվյալների մասին» օրենքը տարածվում է նաև Ռուսաստանի Դաշնության դատարանների գործունեության վրա, վերջիններիս վերաբերող այն նյութերին, որոնք պարունակում են անձնական տվյալներ, ինչպիսիք դատավորների անուններն են, դատի մասնակիցների տվյալները և այլ:

Իհարկե, ցանկացած օրենքում կարելի է գտնել սողանցք և հղում անելով դրան՝ խուսափել որևէ անցանկալի տեղեկատվություն տրամադրելուց, սակայն չպետք է մոռանալ նաև այն, որ ՌԴ իրավասու մարմինների հետ անցկացված խորհրդակցությունների արդյունքում ձեռք էր բերվել պայմանավորվածություն՝ հայկական կողմի ներկայացուցիչների համապատասխան հարցումների դեպքում Վ. Պերմյակովի պատժի կատարման վերաբերյալ հետագայում տեղեկատվություն տրամադրելու մասին:

Ավելի շուտ հայտնել էինք, որ մոտ 2 ամիս է՝ ՀՀ արդարադատության նախարարությունը ևս ՀԺ-ի հարցման հիման վրա դիմել է Ռուսաստանի Դաշնության արդարադատության նախարարություն՝ Վալերի Պերմյակովի վերաբերյալ տեղեկատվություն ստանալու, սակայն մինչ այս պահը պատասխան չկա:

Մանրամասները՝ սկզբնաղբյուր կայքում