Խորեն Հովհաննիսյանը կպաշտպանի Արմեն Մելիքբեկյանի թեկնածությունը
ՍպորտՀայաստանի առաջին խմբում հանդես եկող «Անի» ակումբի նախագահ Խորեն Հովհաննիսյանը հանդես է եկել հայտարարությամբ՝ հայտնելով, որ չի մասնակցի Հայաստանի ֆուտբոլի ֆեդերացիայի նախագահի ընտրություններին:
«ՀՖՖ նախագահի պաշտոնի համար առաջադրվելուս պատճառների մասին վերջին շաբաթների ընթացքում խոսել եմ բազմիցս։ Ինձ այս քայլին մղող հիմնական պատճառները եղել են երկուսը։
Առաջինը` հայկական ֆուտբոլում տարիներ շարունակ տիրող բարձիթողի բարքերին և իրավիճակին վերջապես հրաժեշտ տալու հրամայականն էր, երկրորդը՝ հայկական ֆուտբոլին նոր շունչ հաղորդելը և այդքան պահանջված փոփոխություններ սկսելը։
Ուզում եմ ձեզ տեղեկացնել, որ այսօր հանդիպել եմ ՀՖՖ նախագահի թեկնածու Արմեն Մելիքբեկյանին։ Արմենի հետ միասին արձանագրեցինք, որ հայկական ֆուտբոլի զարգացման շուրջ ունենք նույնական տեսլական։ Չնայած որոշ հարցերում մենք ունենք տարբերվող մոտեցումներ, սակայն քննարկման արդյունքում մենք հանգել ենք այն եզրահանգմանը, որ ընդհանուր առմամբ կարող ենք համատեղ ուժերով հայկական ֆուտբոլը դուրս բերել նոր մակարդակի։
Ելնելով վերոնշյալից՝ որոշել եմ հանել թեկնածությունս որպես ՀՖՖ նախագահ և պաշտպանել Արմեն Մելիքբեկյանի թեկնածությունը։ Իմ կողմից ամեն ինչ կանեմ, որպեսզի Արմենին հաջողվի իրականացնել այն բոլոր ծրագրերը, որոնց մասին զրուցել ենք։ Փորձս և գիտելիքներս շարունակելու եմ ծառայեցնել հայկական ֆուտբոլին՝ ամեն կերպ օժանդակելով մեր երիտասարդներին»,- Խորեն Հովհաննիսյանի հայտարարությունը մեջբերում է «Անի» ՖԱ մամուլի ծառայությունը:
Այսպիսով, ՀՖՖ նախագահի ընտրություններին կմասնակցի 2 թեկնածու՝ ՀՖՖ առաջին փոխնախագահ, գլխավոր քարտուղար Արմեն Մելիքբեկյանը և Վանաձորի «Լոռի» ակումբի սեփականատեր Թովմաս Գրիգորյանը:
1
2
3
4
5
1
2
3
5
2
