Եթե Քոչարյանը հայտնվի ազատության մեջ՝ լրատվամիջոցները հնարավորություն կունենան նրա հետ շփվելու. Վիկտոր Սողոմոնյան

ՀՀ 2-րդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանն այսօր լրագրողների հետ զրույցում ասաց, որ եթե Ռոբերտ Քոչարյանի խափանման միջոցը փոխվի և նա հայտնվի ազատության մեջ, լրատվամիջոցները հնարավորություն կունենան նրա հետ շփվելու։ 

Անդրադառնալով Քոչարյանի կալանքի հարցը քննող Վերաքննիչի դատավոր Մխիթար Պապոյանի դեկտեմբերի 9-ին հայտնած ինքնաբացարկին՝ Սողոմոնյանը նկատեց․ «Այս գործի վերաբերյալ այլևս ապացուցելու բան չկա, քանի որ այն բացարձակ ապօրինի, ոչ մի հիմք չունեցող կալանավորում է, դրա համար դատավորները չեն ուզում գլխացավանքի մեջ ընկնել և բացարկ են վերցնում, որովհետև եթե քննեն պետք է ընկնեն հսկայական ճնշումների տակ և ստիպված լինեն կայացնել ապօրինի որոշում։ Ես չեմ հիշում, որևէ դեպք, երբ որևէ հարցով, որևէ գործով 6 կամ 7 դատավոր բացարկ վերցրած լինի։ Սա աննախադեպ մի բան է, կարծում եմ սա լավագույն ցուցիչն է, թե ինչ վիճակում է իրավակարգը Հայաստանում»,- ասաց նա։