Հանդիպում՝ Երեւանի Փոքր կենտրոնի հանրային գերակա շահ ճանաչված տարածքների բնակիչների հետ

2019 թվականի նոյեմբերի 28-ին Արդարադատության նախարարության «Օրենսդրության զարգացման եւ իրավական հետազոտությունների կենտրոն» հիմնադրամի տնօրեն Տիգրան Դադունցը հանդիպել է Երեւանի Փոքր կենտրոնի մի խումբ բնակիչներին եւ նրանց փաստաբաններին, որոնք ներգրավված են հանրության գերակա շահերի ապահովման նպատակով սեփականության օտարման հարաբերություններում:

Տիգրան Դադունցը նշել է, որ նման երկխոսությունը կարեւոր է՝ օտարման գործընթացներում առկա իրավիճակը համակողմանի պատկերացնելու եւ դրանից բխող խնդիրների լուծման արդյունավետ եղանակներ գտնելու տեսանկյունից, այդ թվում՝ օրենսդրական փոփոխությունների իրականացման միջոցով:

Հանդիպմանը մասնակից քաղաքացիները ներկայացրել են այն խնդիրները, որոնց, սկսած 2008 թվականից, բախվել են հանրության գերակա շահերի ապահովման նպատակով գույքի օտարման գործընթացներում:

Բնակիչների շահերը ներկայացնող փաստաբանները խոսել են այն իրավական ուղիների մասին, որոնք, ըստ իրենց, կարող են հանգեցնել օտարման գործընթացներում քաղաքացիներին հուզող խնդիրների լուծմանը: Քննարկվել են նաեւ օտարման գործընթացներին վերաբերող՝ գործող օրենսդրական կարգավորումները եւ դրանց կիրառման արդյունքում առաջացրած խնդիրները:

Տիգրան Դադունցը կարեւորել է օտարման գործընթացներում փաստական եւ իրավական ամբողջական պատկերի կառուցումը՝ հատկապես հաշվի առնելով այն հանգամանքը, որ դատական եւ իրավական բարեփոխումների 2019-2023 թվականների ռազմավարությամբ նախանշված նպատակներից է նաեւ պետության կամ հասարակության կարիքների համար գույքի հարկադիր օտարումների գործընթացում խախտումների բացահայտումը՝ Փաստահավաք հանձնաժողովի կազմավորման եւ գործունեության միջոցով:

Միեւնույն ժամանակ, ամփոփելով հանդիպման արդյունքները, նշվել է, որ հանդիպման ընթացքում ներկայացված դիրքորոշումները հաշվի կառնվեն համապատասխան փաստական եւ իրավական վերլուծություններ կատարելու եւ ոլորտում առկա խնդիրներին լուծումներ փնտրելու համար: