Հայաստանը պետք է դրսևորի մաքսիմալ քաղաքական զգուշավորություն

Ռուբեն Շուխյանը ֆեյսբուքյան իր էջում գրում է .

Ռուսական լրատվամիջոցները հաղորդում են, որ բառացիորեն ժամեր առաջ Կասպից ծովում տեղակայված ռուսական ռազմանավերից գնդակոծվել են Սիրիայի տարածքում «Իսլամական պետություն» ահաբեկչական խմբավորման թիրախները։ Հաղորդվում է, որ 4 հրթիռային նավեր 11 թիրախների ուղղությամբ արձակել են ծովային տեղակայման 26 թևավոր հրթիռներ` 1,5 հազար կմ հեռավորությունից։ Այսինքն, սրանով կարելի է փաստել, որ արդեն Անդրկովկասի տարածաշրջանն է մտնում լայնածավալ ռազմական գործողությունների ասպարեզ: 

Համակարծիք եմ այն գաղափարը արտահայտողների հետ, որոնք գտնում են, որ Հայաստանը այս իրավիճակում պետք է դրսևորի մաքսիմալ քաղաքական զգուշավորություն: Այժմ մեր գերնպատակը պետք է լինի Ղարաբաղում ստատուս քվոյի պահպանումը՝ դա ուղղակի պարտադիր է: Հասկանալի է, որ Ռուսաստանն իր խնդիրներն ունի` վերահաստատվելու համար որպես «հարց լուծող» պետություն, ինչպես նաև նավթի գների անկման և տնտեսական սանկցիաների հետ կապված բարդագույն խնդիրներ: Բայց պարզ է նաև, որ նա ավելի ու ավելի է սուզվում սիրիական այդ խճճված ու բազմավեկտոր ռազմական կոնֆլիկտի մեջ` իր ողջ անկանխատեսելի հետևանքներով: 

Տեսեք, անգամ Եվրոպան մնում է հնարավորինս չեզոք և ակնհայտ «դիտորդի» դերում է հանդես գալիս այդ երկու «մեծերի»՝ Ռուսաստանի և ԱՄՆ-ի հակամարտության հարցում: Բոլորս արդեն դա մեկ անգամ տեսել ենք՝ 1964-75 թթ. Հյուսիսային և Հարավային Վիետնամների՝ փաստացի սովետա-ամերիկյան երկարաժամկետ պատերազմը: Մեզ տվյալ պարագայում մնում է միայն հետևել, թե ինչով է ի վերջո այս ամենն ավարտվելու՝ հնարավորինս պահպանելով արտաքին քաղաքական հավասարկշռությունը: