Արամ Խաչատրյանի տուն-թանգարանը «Թանգարանային գիշերվան» միացավ Ցեղասպանության տարելիցին նվիրված համերգով

«Թանգարանների գիշեր» միջոցառմանն այս տարի Արամ Խաչատրյանի տուն-թանգարանը միացել է Հայոց ցեղասպանության 100-րդ տարելիցին նվիրված համերգով: Այս մասին «Արմենպրես»-ի հետ զրույցում հայտնեց Արամ Խաչատրյանի տուն-թանգարանի ցուցադրությունների կազմակերպման և հանրահռչակման բաժնի վարիչ Աննա Ասոյանը:
«Այս տարի «Թանգարանների գիշեր» միջոցառմանը մեր թանգարանը մասնակցում է տասներորդ անգամ: Երբ Հայաստանի թանգարանները միացան եվրոպական «Թանգարանների գիշեր» ակցիային, մենք առաջիններից էինք, որ միացանք այդ միջոցառմանը: Մեր ուսումնասիրությունները ցույց են տվել, որ ամեն տարի ավելի շատ այցելուներ ենք ունենում: Կարծում եմ, որ դա թանգարնների գործունեությունից էլ է գալիս:

Թանգարանները սկսել են ակտիվանալ, լայն աշխատանքներ տանել: Այցելուների համար թանգարանն այսօր դարձել է ոչ միայն ցուցադրությունները դիտելու վայր, այլ նաև կրթական կենտրոն և ժամանցի վայր»,- ասաց Ասոյանը: Ներկայացնելով այս տարվա միջոցառումների ցանկը՝ նա նշեց, որ միջոցառումները մեկնարկել են Հայոց ցեղասպանության 100-րդ տարելիցին նվիրված համերգով:

«Արդեն 7-րդ տարին է, ինչ ընթանում է «Հնչյուններ և գույներ» կրթական ծրագիրը: Յուրաքանչյուր այցելու կարող է մասնակցել այս ծրագրին, լսել Արամ Խաչատրյանի երաժշտությունը և հնչյունները վերածել գույների»,- ասաց Ասոյանը:

Միջոցառումների շրջանակներում բացվել է նաև երիտասարդ լուսանկարիչ Պողոս Բարսեղյանի լուսանկարների ցուցահանդեսը, որը կոչվում է «Քարե վկաներ»: Օրվա ավարտին ցուցադրվեց Արամ Խաչատրյանին նվիրված «Ավելի քան սեր» ֆիլմը:
Ֆրանսիայի մշակույթի նախարարության նախաձեռնությամբ Եվրոպայի խորհրդի և ՅՈՒՆԵՍԿՕ-ի հովանավորությամբ ամեն տարի մայիսին անցկացվում է «Թանգարանների գիշեր» համաեվրոպական միջոցառումը: Հայաստանյան թանգարաններն այս միջոցառմանը մասնակցում են 2005 թվականից: