Ազգային պատկերասրահը «Թանգարանների գիշեր» միջոցառման ընթացքում այցելուների պակաս չունեցավ

Հայաստանի ազգային պատկերասրահը «Թանգարանների գիշեր» միջոցառման ընթացքում այցելուների պակաս չունեցավ: Ամենամարդաշատ թանգարանում մայիսի 16-ի երեկոյան տարաբնույթ իրադարձություններ անցկացվեցին, իսկ մշակութասեր հանրությունը հնարավորություն ստացավ ոչ միայն դիտել ՀԱՊ-ի ցուցահանդեսները, այլև համերգներ վայելել:

Հայաստանի ազգային պատկերասրահի տնօրենի ժամանակավոր պաշտոնակատար Անուշ Հակոբյանն «Արմենպրես» -ի հետ զրույցում նշեց, որ այցելուների հոսքը թանգարան սկսվել է ուղիղ ժամը 18:00-ից: «Մինչ այդ էլ այցելուները պատկերասրահի մուտքի առջև խմբված էին: Մենք նոր ցուցադրություններ չբացեցինք, քանի որ ունեինք մի քանի գործող ՝ «Պատասխան 100 տարի անց», «Վկայություն», «Գալանտ դար» խորագրերով և Մացեյ Սվիշևսկու ցուցահանդեսները»,-նշեց նա:

Անուշ Հակոբյանը փաստեց, որ ժամանակավոր ցուցադրություններով պատկերասրահն այս տարի շատ հարուստ է, և իրենք «Թանգարանների գիշերվա» համար համերգներ են ներկայացրել: ՀԱՊ-ում ելույթներ են ունեցել Նարեկացի արվեստի միության «Նարեկ» երգչախումբը, ինչպես նաև հանդես է եկել Նարեկացի համույթը:

«Թանգարանների գիշեր» միջոցառմանն այս տարի մասնակցեց 111 թանգարան: Թանգարանների թիվն այս անգամ ավելացել էր 10-ով: Տարբեր մշակութային օջախներում մայիսի 16-ին անցկացվեցին մի շարք միջոցառումներ, որոնց նպատակը թանգարան-այցելու կապն ամրապնդելն և հասարակության ուշադրությունը գրավելն էր:

Ֆրանսիայի մշակույթի նախարարության նախաձեռնությամբ Եվրոպայի խորհրդի և ՅՈՒՆԵՍԿՕ-ի հովանավորությամբ ամեն տարի մայիսին անցկացվում է «Թանգարանների գիշեր» համաեվրոպական միջոցառումը: Հայաստանյան թանգարաններն այս միջոցառմանը մասնակցում են 2005 թվականից: