Ադրբեջանի «հակակոռուպցիոն» պայքարը

Երբեք չեք գուշակի: Ձեր համբերությունը չչարաշահելու համար ասենք սույն գործչի անուն- ազգանունը և պաշտոնը. Բուլղարիայի փոխնախագահ Մարգարիտ Պոպովա: Սրանով չի ավարտվում այս տիկնոջ ներբողն առ Ադրբեջան, Ադրբեջանի ղեկավարություն և ադրբեջանցիներ: Այն, որ Արևմուտքի և Արևելքի խաչմերուկում գտնվող Ադրբեջանը կարող է կամուրջ /ինչպիսի՞ կամուրջ` երերո՞ւն/ լինել Արևմուտքի և Արևելքի միջև, վաղուց է բազմիցս կրկնված, և բուլղարուհի պաշտոնյան այս հարցում ամենևին ինքնատիպ չէ: Քաղաքավարական ժեստի տպավորություն է գործում Պոպովայի գեղգեղանքը Ադրբեջանի հետ ամեն տեսակի միջպետական հարաբերությունները զարգացնելու վերաբերյալ:

Սակայն պարզապես սպանիչ է Բուլղարիայի փոխնախագահի այն պնդումը, թե երկու երկրների համար խիստ արդյունավետ է… հակակոռուպցիոն պայքարի ոլորտի համագործակցությունը: Ադրբեջանը,- ուշադիր լսեք,- կարող է կոռուպցիայի դեմ պայքարի իր փորձը փոխանցել Բուլղարիային` իհարկե ընդօրինակելով այս երկրի փորձը նույնպես: Սա ընդամենը ներբող- հոդվածի մեկ- երրորդն է. կարող եք ձեր ճաշակով ընտրել ադրբեջանցիների արժանապատվությունը շոյող տասնյակ ու տասնյակ բառակույտեր, և էլի չեք հասնի բուլղարուհի պաշտոնյայի շողոմ խոսքերի ներգործությանը: Լավ, ո՞րն է այս ամբողջ կատակերգության բուն պատճառը, ի՞նչն է Բուլղարիայի փոխնախագահ տիկին Պոպովային մղել այսպիսի զարհուրելի կեղծավորության:

Պատճառը նշված է սևով սպիտակի վրա: Պարզվում է`Ադրբեջանի առաջին տիկինը մեծ ուշադրություն է դարձնում մշակութային ժառանգության պահպանմանը: Մարգարիտ Պոպովան «իբրև քաղաքագետ ու պետական գործիչ և Բուլղարիայի քաղաքացի բացառիկ ուժեղ տպավորություն է ստացել առաջին տիկնոջ այն որոշումից, ըստ որի Ալիևի հիմնադրամն ստանձնում է բուլղարական Վելիկոտըրնովո քաղաքի ճարտարապետական արգելոց թանգարանի վերականգնումը»:

Եթե նկատի առնենք այս հսկայածավալ գործը և դրա հսկայական արժեքը, ապա պետք է խոստովանենք, որ տիկին Պոպովան մի բան էլ պակաս է գովերգել Ադրբեջանն ու ադրբեջանցիներին: Այսպիսով, «խավիարային դիվանագիտությունը» մանկական խաղ կարող է թվալ ալիևյան Ադրբեջանի այս տպավորիչ նախաձեռնության համեմատ: Դժվար է հավատալ, որ Բուլղարիան միակ երկիրն է, որին Ալիևի հիմնադրամն այդպիսի հաճելի անակնկալ է մատուցում: «Բազմամշակութային» այս կոռուպցիան, վստահաբար, իր շոշափուկներն է տարածել այլևայլ երկրներում: