Կյանքից հեռացել է կոմպոզիտոր, ՀՀ արվեստի վաստակավոր գործիչ Գագիկ Հովունցը

ՀՀ կրթության, գիտության, մշակույթի եւ սպորտի նախարարությունը խորը վշտով տեղեկացնում է, որ սեպտեմբերի 1-ին, 89 տարեկանում կյանքից հեռացել է կոմպոզիտոր, ՀՀ արվեստի վաստակավոր գործիչ Գագիկ Հովունցը:

Գագիկ Հովունցը ծնվել է 1930 թ. մարտի 1-ին, Երեւանում: 1939 թ. ուսանել է Երեւանի Ա. Սպենդիարյանի անվան երաժշտական դպրոցի Վ. Ախշարումյանի ջութակի դասարանում, 1946 թ.՝ Երեւանի Պ. Չայկովսկու անվան երաժշտական դպրոցի Կ. Դոմբաեւի դասարանում:

1954 թ. ավարտել է Երեւանի Կոմիտասի անվան պետական կոնսերվատորիայի ջութակի (Կարպ Դոմբաեւի դասարան), 1957 թ.` կոմպոզիցիայի (Գրիգոր Եղիազարյանի դասարան) բաժինները: 1964 թվականից կոնսերվատորիայում դասավանդում է հարմոնիա (1990 թվականից` պրոֆեսոր): Գրել է սիմֆոնիկ եւ կամերային երկեր, գործիքային ստեղծագործություններ՝ դաշնամուրի եւ նվագախմբի, ջութակի եւ նվագախմբի կոնցերտներ, դաշնամուրի եւ նվագախմբի, թավջութակի եւ նվագախմբի կոնցերտային ինվենցիաներ, ինվենցիաների 3 շարք նվագախմբի համար, գործիքային սոնատներ, պիեսներ եւ այլն:

1957 թվականից Հայաստանի կոմպոզիտորների միության անդամ է: 

1978-85 թթ. Մոսկվայում թողարկվել է նրա ստեղծագործությունների 4 ձայնապնակ, 2008 թ. եւ 2013 թ. Փարիզում՝ 2 ձայնասկավառակ:

1962 թ. «Լարային քառյակի» (1960 թ.) համար Մոսկվայում պարգեւատրվել է 1-ին կարգի դիպլոմով: 1984 թ. արժանացել է Հայաստանի արվեստի վաստակավոր գործչի կոչման, 2013 թ.՝ ՀՀ «Հայրենիքին մատուցած ծառայությունների համար» 1-ին աստիճանի մեդալի:  

Գագիկ Հովունցի պայծառ հիշատակը երկար կմնա գործընկերների, մտերիմների, արվեստասեր հասարակության սրտերում: