Մարդասիրություն ադրբեջանական ձևով

Նարեկ Սարգսյանը ֆեյսբուքայն իր էջում գրում է .

Պատկերացնում եք, չէ՞, թե ինչ վայնասուն են բարձրացրել ադրբեջանական լրատվամիջոցները «սահմանախախտի» թեմայով: Ով չի ծուլանում` անպայման մի բան գրում է, իսկ ծուլացող գրեթե չկա:

Բայց, այնուամենայնիվ, «սրանց միջի խելոքը» Armenian Report կայքն է, որը, չնայած անվանը, նույնպես ադրբեջանակա է: Եվ ահա այս կայքը հորդորում է ընդունել, որ «սահմանախախտի» վարմունքը կարող է լիովին արդարացված լինել. գուցե դրանով նա ստույգ հաշվեհարդարից փրկել է իրեն և իր ընտանիքը: «Չէ՞ որ Ադրբեջանը փաստորեն աշխարհի միակ վայրն է, ուր չեն կարող թափանցել հայկական հատուկ ծառայությունների գործակալները և վերացնել «փախստականին»,- լուրջ- լուրջ գրում է հայկական անվամբ այս ադրբեջանական կայքը:

Սրանով հարևան երկիրն ընդունում է հայկական հատուկ ծառայությունների գրեթե անսահմանափակ հնարավորությունը` անցանկալի անձի վերացման գործողություն կատարել աշխարհի մնացած ավելի քան 200 երկրում… Նույնիսկ ոչ բոլոր գերտերություններն ունեն նման տեխնիկական, ֆինանսական, մարդկային, մասնագիտական ռեսուրսներ… Ճիշտ որ` «Երկու ահը մի մահ է»:

Հայկական անվամբ ադրբեջանական այս կայքը հընթացս սույն «փախստականին» և իր ընտանիքը իբր պատահմամբ խառնում է վերջին տասնամյակներին օտար երկրներում աշխատանք և ապրուստ գտած մյուս հայրենակիցներին, նշում աներևակայելի թվեր ու «փաստեր»…
Եվ հանկարծ հոդվածի հեղինակ- հրապարակագիրը որտեղից որտեղ հիշում է «մարդասեր» Թուրքիան, որը քրիստոնյա Եվրոպան, իբր, հնարավորինս զերծ է պահում… մահմեդական փախստականներից:

Ադրբեջանին էլ, ըստ հոդվածագրի, համանման գործառույթ է վիճակված` փակել «սահմանախախտ- փախստականի» նման անձանց մուտքը Եվրոպա: Բայց և նկատի առնելով Ադրբեջանի և Հայաստանի միջև եղած փաստացի պատերազմական դրությունը, Ադրբեջանը «ողորմած» կգտնվի և սույն «փախստականին» ոչ թե կվերադարձնի Հայաստան, այլ ավելի շուտ կհանձնի եվրոպական որևէ երկրի: